ఈ నెల 31 వరకు అంతర్జాతీయ విమానాలు రద్దు

అంతర్జాతీయ విమాన సర్వీసులపై ఉన్న నిషేధాన్ని మరోమారు పొడిగించింది డీజీసీఏ. ఈ నెల 31వరకు సర్వీసులను రద్దు చేస్తున్నట్టు ప్రకటించింది. దేశంలో పెరుగుతున్న కరోనా కేసులే ఇందుకు కారణమని పేర్కొంది.

దేశంలో కరోనా కేసులు భారీగా పెరుగుతున్న తరుణంలో అంతర్జాతీయ విమాన సేవలపై ఉన్న నిషేధాన్ని ఈ నెల 31 వరకు కొనసాగిస్తున్నట్లు డైరెక్టర్​ జనరల్​ ఆఫ్​ సివిల్​ ఏవియేషన్ (డీజీసీఏ) ప్రకటించింది. అయితే పరిమిత మార్గాల్లో మాత్రమే కొన్ని ప్రయాణికుల విమానాలు నడపనున్నట్లు తెలిపింది.

కరోనా కట్టడిలో భాగంగా మార్చి 23 నుంచి అన్ని అంతర్జాతీయ సర్వీసులను భారత్​ నిలిపివేసింది. అయితే మే నెల నుంచి "వందే భారత్​" మిషన్​లో భాగంగా ప్రత్యేక విమానాలను నడిపారు. ఆ తర్వాత ఆంక్షలను మూడు సార్లు(జులై 31, ఆగస్టు 31, సెప్టెంబరు 30 వరకు) పొడిగిస్తూ వచ్చింది డీజీసీఏ. తాజాగా ఈ నెలాఖరు వరకు పొడిగిస్తూ నిర్ణయం తీసుకుంది.

అయితే పలు దేశాలకు ప్రత్యేక విమానాలను నడిపేందుకు ఎయిర్‌ బబుల్‌ ఒప్పందం ద్వారా భారత్ విమాన సేవలను పునరుద్ధరించింది. ఇందులో భాగంగా జులై నుంచి అమెరికా, బ్రిటన్‌, ఫ్రాన్స్‌, భూటాన్​, కెన్యా, యునైటెడ్ అరబ్ ఎమిరేట్స్‌ (యూఏఈ)కు విమాన సేవలను ప్రారంభించింది.

ఇదీ చూడండి:'ఆరోగ్యంగానే ఉన్నా.. అందరికీ కృతజ్ఞతలు'