బండ బాదుడు: మళ్లీ పెరిగిన వంట గ్యాస్ ధర

వంట గ్యాస్ ధరలు మరోసారి పెరిగాయి. 14.2 కిలోల ఎల్​పీజీ గ్యాస్ సిలిండర్ ధరను రూ.819కు పెంచుతూ చమురు మార్కెటింగ్ సంస్థలు నిర్ణయం తీసుకున్నాయి. సోమవారం నుంచే పెరిగిన ధరలు అమలులోకి రానున్నాయి.

సామాన్యులకు చమురు మార్కెటింగ్ సంస్థలు మరోసారి షాకిచ్చాయి. వంట గ్యాస్​ ధరను రూ.25 పెంచాయి. దీనితో 14.2 కిలోల ఎల్​పీజీ సిలిండర్ ధర రూ.794 నుంచి రూ.819కి చేరింది. పెరిగిన ధరలు తక్షణమే అమలులోకి రానున్నట్లు చమురు మార్కెటింగ్ సంస్థలు స్పష్టం చేశాయి.

వంట గ్యాస్​ ధర 2020 డిసెంబర్​ 1 నుంచి ఇప్పటి వరకు రూ.255 పెరిగింది. ఈ ఏడాది జనవరిలో ఒకసారి, ఫిబ్రవరిలో మూడు సార్లు వంట గ్యాస్ ధరలు పెరిగాయి.

అదేసమయంలో, వాణిజ్య అవసరాలకు వాడే సిలిండర్ ధరనూ రూ.95 పెంచాయి చమురు మార్కెటింగ్ సంస్థలు. తాజా నిర్ణయంతో ఒక కమర్షియల్​ సిలిండర్​ ధర రూ.1,614 వద్దకు చేరింది. పెరిగిన ధరలు సోమవారం నుంచే అమలులోకి రానున్నాయి.

ఇదీ చదవండి:జీఎస్​టీ వార్షిక రిటర్నులకు మరోమారు గడువు పొడిగింపు