పంజాబ్‌ నేషనల్‌ బ్యాంక్‌ కుంభకోణం (PNB Scam) నిందితుడు, వజ్రాల వ్యాపారి మెహుల్‌ ఛోక్సీ(Mehul Choksi) అదృశ్యం.. అరెస్టు వ్యవహారం అనేక మలుపులు తిరుగుతోంది. గత ఆదివారం ఆంటిగ్వాలో కన్పించకుండా పోయిన ఆయన రెండు రోజుల తర్వాత పక్కనే ఉన్న డొమినికా దీవిలో పోలీసులకు చిక్కారు. అయితే కొంతమంది వ్యక్తులు తనను కిడ్నాప్ చేసి డొమినికా తీసుకెళ్లారని ఛోక్సీ(Mehul Choksi) చెప్పినట్లు ఆయన తరఫున న్యాయవాది ఆరోపించారు. ఈ మేరకు డొమినికా కోర్టులో హెబియస్‌ కార్పస్‌ పిటిషన్‌ దాఖలు చేశారు. దీంతో ఛోక్సీని భారత్కు అప్పగించడంపై అక్కడి న్యాయస్థానం స్టే విధించింది.
ఛోక్సీని కలిసేందుకు అనుమతినివ్వలేదు..
డొమినికా పోలీసుల అదుపులో ఉన్న ఛోక్సీని(Mehul Choksi) ఆయన న్యాయవాదుల బృందం కలిసేందుకు అనుమతినివ్వలేదు. అయితే చాలా సార్లు ప్రయత్నించిన తర్వాత వీడియో కాల్‌లో మాట్లాడేందుకు అంగీకరించినట్లు డొమినికాలోని ఆయన లాయర్‌ వేన్‌ మార్ష్‌ తెలిపారు. 'ఛోక్సీని కలిసేందుకు అనుమతి ఇవ్వలేదు. ఆయనను తీవ్రంగా కొట్టినట్లు అన్పిస్తోంది. కళ్లు ఉబ్బిపోయాయి. ఒంటిపై కాలిన గాయాలు ఉన్నాయి. ఆంటిగ్వాలోని జాలీ హార్బర్‌ వద్ద నుంచి కొంతమంది వ్యక్తులు తనను బలవంతంగా లాక్కొని ఓ బోటులో డొమినికా తీసుకొచ్చారని ఆయన నాతో చెప్పారు. వారు భారత్, ఆంటిగ్వా పోలీసులు అయి ఉంటారని ఆయన అన్నారు' అని మార్ష్‌ చెప్పుకొచ్చారు.
ఆంటిగ్వాలో ఛోక్సీ ఉన్నట్టుండి అదృశ్యమవడం, డొమినికా పోలీసులు అరెస్టు చేయడం అనుమానాస్పదంగా ఉందని ఆయన లీగల్ టీం ఆరోపించింది. భారత్కు రప్పించేందుకు కావాలనే ఆయనను డొమినికా తీసుకెళ్లి ఉంటారని లాయర్లు అన్నారు. అయితే ఆయనకు భారత్ పౌరసత్వం లేదని, అలాంటప్పుడు ఆ దేశానికి ఎలా అప్పగిస్తారంటూ న్యాయస్థానాన్ని ఆశ్రయించారు. దీనిపై విచారణ జరిపిన కోర్టు అప్పగింతపై స్టే విధించింది. తదుపరి విచారణను డొమినికా కాలమానం ప్రకారం.. శుక్రవారం ఉదయం విచారించనున్నట్లు తెలుస్తోంది.