Broadband tariff hikes: నిన్న మొన్నటి వరకు చౌకగా దొరికిన మొబైల్ డేటా ఖరీదుగా మారింది. ప్రస్తుతం కాస్త తక్కువ ధరకే లభిస్తున్న బ్రాడ్‌బ్యాండ్‌ సేవల ధరలకూ రెక్కలు రానున్నాయా? అంటే అవుననే సమాధానం వినవస్తోంది.
Mobile data price hike: మొబైల్ ఛార్జీల తరహాలోనే బ్రాడ్‌బ్యాండ్‌ సేవలూ ప్రియం కానున్నాయని తెలుస్తోంది. సమీప భవిష్యత్‌లోనే ఈ పెంపు అవకాశం ఉందని కోల్‌కతాకు చెందిన ప్రముఖ బ్రాడ్‌బ్యాండ్‌ సంస్థ మేఘబెలా సహ వ్యవస్థాపకుడు తపబ్రత ముఖర్జీ అభిప్రాయపడ్డారు. ఈ మేరకు పీటీఐ వార్తా సంస్థతో ఆయన మాట్లాడారు.
"టెలికాం రంగంలోని బీఎస్‌ఎన్‌ఎల్‌ మినహా మిగిలిన అన్ని కంపెనీలూ ఇటీవల ప్రీపెయిడ్‌ మొబైల్ ఛార్జీలను సవరించాయి. 20 శాతం మేర ధరలను పెంచాయి. వ్యాపారంలో సుస్థిరతకు ఈ పెంపు అవసరమని దాదాపు అన్ని కంపెనీలూ పేర్కొన్నాయి. ఇదే తరహాలో ఒక వినియోగదారుడి నుంచి వచ్చే సగటు ఆదాయం (ఆర్పు) పెరగాలంటే బ్రాడ్‌బ్యాండ్‌ సేవలందించే సంస్థలూ ధరలు పెంచాల్సిన అవసరం ఉంది. సమీప భవిష్యత్‌లోనే ఈ పెంపు ఉంటుంది. పోటీ మార్కెట్‌లో వ్యాపారం కొనసాగించాలంటే 15-20 శాతం మేర పెంపు అవసరం."