మార్కెట్లోకి కైరోన్ బెహ్రింగ్ ర్యాబిస్ టీకా భారత్ బయోటెక్... తన అనుబంధ సంస్థ కైరోన్ బెహ్రింగ్ ద్వారా ర్యాబిస్ టీకాను విపణిలోకి సరికొత్తగా విడుదల చేసింది. దీనిని 'కైరోర్యాబ్' పేరుతో మార్కెట్లోకి తీసుకొచ్చినట్లు దిల్లీలో ప్రకటించింది.
'రబీపుర్' సాంకేతికతతో...
కైరోన్ బెహ్రింగ్ ఇంతకు ముందు ర్యాబిస్ టీకాను 'రబీపుర్' పేరుతో విక్రయించింది. అయితే భారత్ బయోటెక్ ఈ ఏడాది మార్చిలో జీఎస్కే నుంచి కైరోన్ బెహ్రింగ్ను కొనుగోలు చేసింది. మేలో గుజరాత్లోని అంకలేశ్వర్ యూనిట్ నుంచి తన వాణిజ్య కార్యక్రమాలను ప్రారంభించింది.
"ఈ కొత్త ర్యాబిస్ టీకాను 'రబీపుర్' సాంకేతికతనే ఉపయోగించి, అదే ప్రదేశంలో తయారుచేస్తున్నాం. కైరోర్యాబ్ తయారీ, మార్కెటింగ్ను వేగవంతం చేయడానికి మేము కట్టుబడి ఉన్నాం."
- కృష్ణ ఎల్లా, భారత్ బయోటెక్ ఛైర్మన్ అండ్ ఎమ్డీ
టీకాల కొరత తీర్చేందుకు..
ర్యాబిస్ టీకాను వివిధ రాష్ట్రాల ప్రభుత్వ ఆసుపత్రులకు టెండర్ల ద్వారా అందుబాటులోకి తీసుకొస్తామని కంపెనీ స్పష్టం చేసింది. మిగిలిన వాటిని ప్రైవేట్ మార్కెట్కు, ఎగుమతులకు కేటాయిస్తామని తెలిపింది.
"ర్యాబిస్ టీకాల కొరతను పూడ్చడానికి నిబద్ధతతో కృషి చేస్తున్నాం. అందుకే ఉత్పత్తి సామర్థ్యాన్ని ఏటా 15 మిలియన్ డోస్లు పెంచడానికి అదనపు పెట్టుబడులు పెడుతున్నాం."
- కృష్ణ ఎల్లా, భారత్ బయోటెక్ ఛైర్మన్ అండ్ ఎమ్డీ
ఇండిర్యాబ్ పేరుతో మరొకటి...
భారత్ బయోటెక్.. 'ఇండిర్యాబ్' పేరుతో ఏటా 12 మిలియన్ ర్యాబిస్ వ్యాక్సిన్ డోస్లను తయారుచేస్తోంది. ఫలితంగా రెండు సంస్థల మొత్తం ఉత్పత్తి సామర్థ్యం సంవత్సరానికి 27 మిలియన్ డోస్లకు పెరిగింది.
40 మిలియన్ డోస్లు అవసరం...
ప్రపంచ ఆరోగ్య సంస్థ ప్రకారం కుక్కల నుంచి వ్యాపించే 'ర్యాబిస్' అనేది నివారించగలిగే వ్యాధి. అయితే టీకా అందుబాటులో లేక ఏటా 59 వేల మంది ప్రాణాలు కోల్పోతున్నారు. ముఖ్యంగా ఆసియా, ఆఫ్రికా దేశాల్లో ప్రాణనష్టం ఎక్కువ.
భారత్లో ఏటా 17.4 మిలియన్ కుక్కకాటు కేసులు నమోదు అవుతున్నాయి. ఫలితంగా 20 వేల 800 ర్యాబిస్ మరణాలు సంభవిస్తున్నాయి. అంటే భారత్లో ఏడాదికి 40 మిలియన్ డోస్ల రాబిస్ వ్యాక్సిన్ అవసరం.
ఇదీ చూడండి: పెళ్లిళ్ల సీజన్తో పసిడి ధర పైపైకి.. నేటి ధరలు ఇవే...
