విద్యుత్ కార్లు.. భవిష్యత్ అంతా వీటిదే అనడంలో సందేహం లేదు. ఇప్పటికే చాలా దేశాలు కర్భన ఉద్గారాలు తగ్గించేందుకు విద్యుత్ కార్ల వినియోగాన్ని ప్రోత్సహిస్తున్నాయి. టెస్లా వంటి కంపెనీలు విద్యుత్ కార్ల క్రేజ్ను మరింత పెంచాయి.
పెరుగుతున్న సాంకేతికత, మౌలిక సదుపాయాలతో వేగం, ప్రయాణించే దూరం సహా అనేక విషయాల్లో సంప్రదాయ పెట్రోల్, డీజిల్ కార్లకు విద్యుత్ వాహనాలు గట్టి పోటీనిస్తున్నాయి. పెట్రోల్, డీజిల్ వాహనాలకన్నా.. విద్యుత్ కార్ల నిర్వహణ ఖర్చులు చాలా తక్కువగా ఉండటం వల్ల చాలా మంది వీటిని కొనేందుకు మొగ్గు చూపుతున్నారు.
అయితే మన దేశంలో ప్రస్తుతం.. టెస్లా కార్లు ఇంకా అంతగా వినియోగంలోకి రాలేదు. ఇటీవలే కంపెనీ కార్యకలాపాలు ప్రారంభమైన నేపథ్యంలో పెద్ద ఎత్తున ఆ కార్లు అందుబాటులోకి వచ్చేందుకు కాస్త సమయం పట్టొచ్చు. అయితే మన దేశంలో టాటా, హ్యూందాయ్, ఎంజీ, బెంజ్ సహా పలు ఇతర కంపెనీలు విద్యుత్ కార్లను విక్రయిస్తున్నాయి. ఆ కార్ల ధరలు, ఇతర ఫీచర్ల వివరాలు ఇలా ఉన్నాయి.
జాగ్వర్ ఐ పేస్
- ఇది ఎస్, ఎస్ఈ, హెచ్ఎస్ఈ వేరియంట్లలో లభిస్తోంది.
- ధర - 1.05 కోట్ల నుంచి 1.12 కోట్లు
- రైడింగ్ రేంజ్ - 470 కిలోమీటర్లు
- టాప్ స్పీడ్ - గంటకు 200 కిలోమీటర్లు
- పూర్తి ఛార్జింగ్ టైమ్ - 8.5 గంటలు, స్పీడ్ ఛార్జింగ్తో 2 గంటలు
- సీటింగ్ కెపాసిటీ - 5
- పవర్(గరిష్ఠం) - 394.26 బీహెచ్పీ జాగ్వర్ ఐ పేస్
- 4.8 సెకన్లలో సున్నా నుంచి 100 కిలోమీటర్ల వేగాన్ని అందుకుంటుంది.
స్ట్రామ్ మోటార్స్ ఆర్3
- ధర - రూ. 4.50 లక్షలు
- రైడింగ్ రేంజ్ - 200 కిలోమీటర్లు
- టాప్ స్పీడ్ - గంటకు 80 కిలోమీటర్లు
- సీటింగ్ కెపాసిటీ - 2
- ఛార్జింగ్ టైమ్ - 3 గంటలు
- పవర్(గరిష్ఠం) - 20.11 బీహెచ్పీ స్ట్రామ్ మోటార్స్ ఆర్3
- 200 కిలోమీటర్ల రైడింగ్ రేంజ్ ఎలక్ట్రిక్ వాహనానికి ప్రస్తుతం బుకింగ్స్ ప్రారంభమయ్యాయి. 120 కిలోమీటర్లు, 180 కిలోమీటర్ల రేంజ్ వాహనాన్ని కూడా తీసుకురానుంది స్ట్రామ్ మోటార్స్.