హోటళ్లు, రెస్టారెంట్లలో వంట గది పరిశుభ్రత చాలా ముఖ్యం. వంటగదిని శుభ్రం చేస్తున్నారా? చెఫ్‌లు జాగ్రత్తలు తీసుకుంటున్నారా? దుకాణానికి ఏ సమయంలో ఎక్కువ వినియోగదారులు వస్తున్నారు? ఇలాంటి వాటిని ఎప్పటికప్పుడు తెలుసుకోవడమూ కష్టమైన పనే. ఇలాంటి సమస్యలన్నింటికీ సులువుగా పరిష్కారం చూపిస్తామంటున్నారు.. 'అవర్‌ఐ.ఏఐ' అంకుర వ్యవస్థాపకులు మీరాన్‌ జునైదీ, సౌరవ్‌ సన్యాల్‌, సౌరబ్‌ ఘనేకర్‌, అజయ్‌.
ఎస్‌ఆర్‌ఎం, అమరావతిలో చదువుకునే సమయంలో ఒక సెమిస్టర్‌ కోసం కాలిఫోర్నియా, విశ్వవిద్యాలయం, బర్క్‌లీకి వెళ్లాం. అక్కడ ఉన్న సమయంలో ఫోన్‌ పోయింది. దీనిపై పోలీసులకు ఫిర్యాదు చేశాం. వారు మొత్తం ఫుటేజ్‌ను పరిశీలించాల్సిందిగా మాకు చెప్పారు. అది కష్టమైన పని అని అర్థమైంది. సీసీ కెమేరాలను ఏర్పాటు చేసినా వాటి ఫుటేజీలను పరిశీలించడం అంత సులువు కాదు. ఇలాంటి సమస్యను పరిష్కరించేందుకే 'అవర్‌ఐ.ఏఐ'ను స్థాపించాం. బర్క్‌లీలో జరిగిన హ్యాకథాన్‌లోనూ ఈ ప్రాజెక్టుకు బహుమతి లభించింది. దీంతో దీన్నే వ్యాపారంగా ప్రారంభించాం. సీసీ కెమేరాలకు కృత్రిమ మేధ, డీప్‌ లెర్నింగ్‌ సాంకేతికతను వినియోగించి, దీన్ని రూపొందించాం.
ఇలా పని చేస్తాయి..
ప్రస్తుతం ఆహారశాలలు, రిటైల్‌ దుకాణాలు, పని ప్రదేశాల్లో ఈ సీసీ కెమేరాలను ఏర్పాటు చేస్తున్నాం. దుకాణంలో ఎవరైనా వస్తువు కనిపించకుండా దుస్తుల్లో దాచుకొని వెళ్లేందుకు ప్రయత్నిస్తే కెమేరాలు వెంటనే గుర్తించి, యజమానికి సమాచారం అందిస్తాయి. ఒకవేళ వారు బిల్‌ కట్టకపోతే వెంటనే పట్టుకోవచ్చు. విదేశాల్లో కొన్ని రిటైల్‌ దుకాణాల్లో ఇలాంటి దొంగతనాలు ఎక్కువే. మన దేశంలోనూ పెద్దపెద్ద రిటైల్‌ స్టోర్లలో జరుగుతూ ఉంటాయి. హోటళ్లు, రెస్టారెంట్లలో వంటగదుల శుభ్రత చాలా ముఖ్యం. వంటగదిని ఎన్ని సార్లు శుభ్రం చేశారు? చెఫ్‌లు, సిబ్బంది నిబంధనలకు అనుగుణంగా గ్లౌజ్‌లు, మాస్కులు తదితరాలను ధరిస్తున్నారా? శాకాహారం, మాంసాహారం వంటలకు వేర్వేరు పాత్రలు వినియోగిస్తున్నారా? ఇలాంటి వాటిని కెమేరాలు పరిశీలిస్తాయి. ఒకవేళ ఏమైనా తేడా ఉంటే వెంటనే యజమానికి సమాచారం వెళ్తుంది. హోటల్‌కు ఏ సమయంలో ఎక్కువ మంది వినియోగదారులు వస్తున్నారు? ఏ వయసు వారు? వారు బిల్లింగ్‌ కోసం ఎంత సమయం వేచి చూడాల్సి వస్తోంది? ఆహార పదార్థాన్ని తిన్నప్పుడు సంతృప్తి వ్యక్తం చేశారా? లేదా? అనే విశ్లేషణ వ్యాపార సంస్థ యజమానికి అందుతుంది. ప్రస్తుత కరోనా సమయంలో మాస్కులు ధరించని వారినీ ఇది అప్రమత్తం చేస్తుంది.