ప్రైవేటీకరణను నిరసిస్తూ రెండు రోజులు బ్యాంకులు బంద్​!

మార్చి 15, 16తేదీల్లో బందుకు పిలుపునిచ్చాయి బ్యాంకు యూనియన్లు. ప్రభుత్వ బ్యాంకుల ప్రైవేటీకరణను నిరసిస్తూ ఈ మేరకు నిర్ణయం తీసుకున్నట్లు పేర్కొన్నాయి.

రెండు ప్రభుత్వ బ్యాంకుల ప్రవేటీకరణను నిరసిస్తూ తొమ్మిది బ్యాంకు యూనియన్లు మార్చి15, 16 తేదీల్లో రెండు రోజుల పాటు బందుకు పిలుపునిచ్చాయి. ఈ మేరకు 'యూనైటెడ్​​ ఫోరం ఆఫ్​ బ్యాంక్​ యూనియన్స్​'(యూఎఫ్​బీయూ) ప్రకటించింది.

మార్చి 4, 9, 10 తేదీల్లో అడిషనల్​ చీఫ్​ లేబర్​ కమిషనర్​తో జరిగిన సమావేశంలో ఆశాజనక ఫలితం రాలేదని 'అఖిల భారత బ్యాంకు ఉద్యోగుల సంఘం' ప్రధాన కార్యదర్శి సీహెచ్​ వెంకటాచలం తెలిపారు. దీంతో బందుకు వెళుతున్నామని, దాదాపు 10లక్షల మంది బ్యాంకు ఉద్యోగులు బంద్​లో పాల్గొంటారని వెల్లడించారు.

బంద్​ నేపథ్యంలో బ్యాంకు సేవలకు ఏర్పడే అంతరాయం గురించి ఇప్పటికే ఎస్​బీఐ.. ఖాతాదారులకు ప్రకటన విడుదల చేసింది. మరికొన్ని బ్యాంకులు కూడా బందు వల్ల ఏర్పడే అంతరాయం గురించి తెలిపాయి.

రెండు ప్రభుత్వ బ్యాంకులను ప్రైవేటీకరిస్తామని గత నెలలో బడ్జెట్​ సమావేశాల్లో కేంద్ర ఆర్థిక మంత్రి నిర్మలా సీతారామన్​ ప్రకటించారు. అయితే ఏ బ్యాంకులను ప్రైవేటీకరిస్తారో మాత్రం చెప్పలేదు.

ఇదీ చదవండి:త్వరలో మరో నాలుగు బ్యాంకులు ప్రైవేటీకరణ!