'లాక్​డౌన్​తో ఆర్థిక వ్యవస్థకు ఇబ్బందులు'

కరోనాను అరికట్టేందుకు కొన్ని ప్రాంతాల్లో విధిస్తున్న లాక్​డౌన్​ కారణంగా.. పెద్దగా ప్రయోజనం ఉండదని అనిల్​ అంబానీ తనయుడు అన్​మోల్​ అన్నారు. ఆంక్షలు విధించడం వల్ల.. ఆర్థికంగా తీవ్ర ఇబ్బందికర పరిస్థితులు తలెత్తుతాయని ట్విట్టర్​లో పేర్కొన్నారు.

కొవిడ్​-19 కేసుల వ్యాప్తిని నిరోధించేందుకు కొన్ని రాష్ట్రాల్లో విధిస్తున్న లాక్​డౌన్​ల వల్ల పెద్దగా ప్రయోజనం ఉండకపోగా.. ఆర్థిక వ్యవస్థకు తీవ్ర ఇబ్బందులు ఎదురవుతాయని అనిల్​ అంబానీ తనయుడు అన్​మోల్​ అంబానీ అభిప్రాయపడ్డారు. గతంలో రిలయన్స్​ క్యాపిటల్​ ఎగ్జిక్యూటివ్​ డైరెక్టర్​గా అన్​మోల్​ బాధ్యతలు నిర్వర్తించారు. కొత్తగా విధిస్తున్న పాక్షిక లాక్​డౌన్​ నియమాలు చిన్న వ్యాపారాలు, రోజువారీ కార్మికులపై తీవ్ర ప్రభావం చూపుతాయని అన్​మోల్​ వరుస ట్వీట్​లు చేశారు.

"నటీనటులు వారి సినిమాలకు పని చేయొచ్చు. క్రికెటర్లు క్రికెట్​ ఆడుకోవచ్చు. రాజకీయ నాయకులు భారీగా జనాలను సమీకరించి ర్యాలీలు నిర్వహించుకోవచ్చు. అయితే.. చిరు వ్యాపారులు, కార్మికుల పనుల మాత్రం ఆగిపోతాయి." అని అన్​మోల్​ ట్విట్టర్​లో వెల్లడించారు. హ్యాష్​ట్యాగ్​ స్కామ్​డెమిక్​ పేరుతో 'ప్రతి వ్యక్తికి అతని పని చాలా అత్యవసరమైనదే'నని పేర్కొన్నారు.

మహారాష్ట్రలో అత్యవసరం కాని సేవల నిలిపివేత, దిల్లీలో రాత్రి సమయంలో కర్ఫ్యూ విధింపు నేపథ్యంలో అన్​మోల్​ ఇలా స్పందించారు. మరో లాక్​డౌన్​తో స్థానిక వ్యాపారాలపై తీవ్ర ప్రభావం పడుతుందని అభిప్రాయపడ్డారు​.

ఇదీ చదవండి:సిప్ టాప్‌-అప్​తో మరింత రాబడి