'పంట రాబడి గతేడాది కంటే ఎక్కువ రావొచ్చు'

ఈసారి రబీ పంట దిగుబడి గతేడాది కంటే ఎక్కువ ఉంటుందని కేంద్ర వ్యవసాయ శాఖ మంత్రి నరేంద్ర సింగ్ తోమర్​ ఆశాభావం వ్యక్తం చేశారు. వ్యవసాయ రంగానికి కేంద్రం చేపడుతున్న చర్యలు రైతులకు మేలు చేస్తాయన్నారు.

రబీ పంట ఉత్పత్తి గతేడాది కన్నా ఎక్కువ ఉంటుందని కేంద్ర వ్యవసాయ శాఖ మంత్రి నరేంద్ర సింగ్ తోమర్ ఆశాభావం వ్యక్తం చేశారు. 2020-21 రబీ పంట కాలంలో వచ్చిన 15.3 కోట్ల టన్నుల కన్నా ఎక్కువ దిగుబడి వస్తుందని అభిప్రాయపడ్డారు.

వ్యవసాయ రంగం భేష్​..

కొవిడ్​ పరిస్థితులను లక్ష్యపెట్టకుండా రైతులు సాగు చేశారని, 2020 ఖరీఫ్​ పంటకు మంచి దిగుబడి లభించిందన్నారు. కేంద్రం ప్రవేశ పెట్టిన సాగు చట్టాలు, పదివేల ఎఫ్​పీఓ (ఫార్మర్​ ప్రొడ్యూసర్స్ ఆర్గనైజేషన్స్ )ల ఏర్పాటు, సాగు రంగంలో మౌలిక సదుపాయాలకు లక్షల కోట్ల కేటాయింపు.. రైతులకు మేలు చేస్తాయన్నారు.

పెరిగిన గోధుమల సాగు..

ప్రభుత్వ గణాంకాల ప్రకారం.. గత రబీ పంటకాలంతో పోలిస్తే ఈసారి గోధుముల సాగు 4 శాతం పెరిగింది. మొత్తం 325.35 లక్షల హెక్టార్లలో సాగు చేస్తున్నారు. పప్పుధాన్యాల సాగు కూడా 5 శాతం పెరిగి 154.80 లక్షల హెక్టార్లకు చేరింది. రబీ పంట సాగు 603.15 లక్షల హెక్టార్ల నుంచి 620.71 లక్షల హెక్టార్లకు పెరిగింది.

ఇదీ చూడండి :'నేను జ్యోతిష్కుడిని కాను.. కానీ సానుకూల ఫలితాలు రావచ్చు'