భారత వృద్ధి అంచనాలను భారీగా తగ్గించిన ఏడీబీ

ఆసియా అభివృద్ధి బ్యాంకు.. ప్రస్తుతం ఆర్థిక సంవత్సరంలో భారత వృద్ధి అంచనాలను 6.5 శాతానికి తగ్గించింది. 2020లో వృద్ధి రేటు 7.2 శాతంగా ఉంటుందని అంచనా వేసింది.

ప్రస్తుత ఆర్థిక సంవత్సరంలో భారత వృద్ధి అంచనాలను ఆసియా అభివృద్ధి బ్యాంకు 6.5 శాతానికి తగ్గించింది. ఈ ఏడాది మొదటి త్రైమాసికంలో భారత జీడీపీ వృద్ధి రేటు 6 ఏళ్ల కనిష్ఠానికి పడిపోయిన నేపథ్యంలో ఈ అంచనాకు వచ్చినట్లు తెలిపింది.

"ఏప్రిల్-జూన్ మొదటి త్రైమాసికంలో భారత వృద్ధి 5 శాతానికి నెమ్మదించింది. అందుకే 2019 ఆర్థిక సంవత్సరానికి భారత వృద్ధి అంచనా 6.5 శాతానికి తగ్గింది. అయితే 2020 ఆర్థిక సంవత్సరంలో భారత్​ 7.2 శాతం మేర వృద్ధి సాధించే అవకాశం ఉంది."
- ఆసియా అభివృద్ధి బ్యాంకు

ఈ జులైలో భారత జీడీపీ వృద్ధి అంచనాలను 2019-20 సంవత్సరానికిగానూ 7 శాతానికి తగ్గించింది ఏడీబీ. కొద్ది నెలలకే ఆ లెక్కలను సవరించింది.

"సాధారణ ఎన్నికలకు ముందు తయారీ, పెట్టుబడుల ఆకస్మిక క్షీణత తీవ్ర అనిశ్చితిని ప్రతిబింబించింది. బ్యాంకులు, ఇతర ఆర్థిక సంస్థలు రుణాల మంజూరును తగ్గించడం, గ్రామీణ ఆర్థిక వ్యవస్థపై ఒత్తిడి, దేశ వృద్ధి అంచనాలను బలహీనపరిచాయి" అని తన నివేదికలో వివరించింది ఏడీబీ.

ఏడీబీ తాజా అంచనాల ప్రకారం... దక్షిణాసియా వృద్ధి వేగం కూడా మందగించింది. ఫలితంగా ఈ ప్రాంత వృద్ధి అంచనాలను 2019లో 6.2 శాతానికి, 2020లో 6.7 శాతానికి తగ్గించినట్లు ఏడీబీ వెల్లడించింది.

ఇదీ చూడండి: 'గ్లోబల్​ గోల్​ కీపర్' పురస్కారం​ స్వీకరించిన మోదీ