భారత్లో కరోనా వైరస్ను కట్టడి చేసేందుకు 1.5 బిలియన్ డాలర్లను(రూ.11,400కోట్లు) ఆర్థిక సాయంగా అందించేందుకు ఆమోదం తెలిపింది ఏసియన్ డెవలప్మెంట్ బ్యాంకు(ఏడీబీ). కరోనా నియంత్రణ చర్యలు, పేదలు, ఆర్థిక ఇబ్బందులు ఎదుర్కొంటున్న వారికి అండగా ఉండాలనే ఈ నిధులను మంజూరు చేసినట్లు తెలిపింది.
కష్టకాలంలో భారత్కు అన్ని విధాలా అండగా ఉండేందుకు కట్టుబడి ఉన్నట్లు ఏడీబీ అధ్యక్షుడు మసాత్సుగు అసకావా చెప్పారు. ప్రభుత్వం, అభివృద్ధి భాగస్వాములకు సహకారం అందించే భారీ ప్యాకేజీలో భాగంగానే ఈ నిధులను తక్షణమే మంజూరు చేసినట్లు వివరించారు.
ఫిలిప్పీన్స్ రాజధాని మనీలా కేంద్రంగా ఉన్న ఏడీబీ, కోవిడ్-19 యాక్టివ్ రెస్పాన్స్ అండ్ ఎక్స్పెండిచర్ సపోర్ట్(కేర్స్) కార్యక్రమం ద్వారా 80 కోట్ల మంది ప్రజలకు నేరుగా సాయం చేస్తున్నట్లు ప్రకటించింది. వేల కుటుంబాలు, నిరు పేదలు, రైతులు, ఆరోగ్య కార్యకర్తలు, దివ్యాంగులకు మెరుగైన ఆరోగ్య సదుపాయాలు కల్పించేందుకు వీటిని వినియోగించవచ్చని పేర్కొంది.
20 బిలియన్ డాలర్లతో కొవిడ్-19 పాండెమిక్ రెస్పాన్స్ ఆప్షన్ను(సీపీఆర్ఓ) కరోనాపై పోరు కోసం ఏప్రిల్ 13న ఏర్పాటు చేసింది ఏడీబీ. సభ్యదేశాలకు ఆర్థిక సాయం అందించనున్నట్లు ప్రకటించింది. దీని ద్వారానే కేర్స్ కార్యక్రమం నిర్వహిస్తోంది. .
కరోనా నియంత్రణకు భారత్ చేపట్టిన చర్యలను కొనియాడింది ఏడీబీ. ఆర్థిక ప్యాకేజీ ప్రకటించడం, వైద్య సిబ్బందికి జీవిత బీమా కల్పించడాన్ని ప్రస్తావించింది. ఆర్థిక వ్యవస్థను బలోపేతం చేయడానికి భారత్కు మద్దతుగా ఉంటామని తెలిపింది.
