కరోనా మహమ్మారిపై పోరులో భారత్కు ఆర్థికంగా మద్దతుగా నిలుస్తోంది ఆసియా అభివృద్ధి బ్యాంకు (ఏడీబీ). మూడు నెలల క్రితం కొవిడ్ కట్టడికి రూ. 11,400 కోట్లు (1.5బిలియన్ డాలర్)ల మేర రుణం మంజూరు చేసిన బ్యాంకు.. తాజామరో రూ. 22.45 కోట్ల (3 మిలియన్ డాలర్లు) ఆర్థిక సాయం ప్రకటించింది.
కరోనా విజృంభిస్తున్న వేళ తక్షణ చర్యలైన వ్యాధులపై నిఘా పెంపు, కాంటాక్ట్ ట్రేసింగ్, వ్యాధి నిర్ధరణ వంటి వాటి కోసం ఈ రుణం మంజూరు చేసినట్లు తెలిపింది ఏడీబీ. నిరుపేద, ఆర్థికంగా చితికిపోయిన రంగాల ప్రజలకు సామాజిక భద్రత కల్పించే చర్యల్లో భాగంగా ఈ నిర్ణయం తీసుకున్నట్లు వెల్లడించింది.
" ఈ నిధులు కొవిడ్-19 కట్టడి చర్యల బలోపేతంలో భారత ప్రభుత్వానికి ఏడీబీ మద్దతు కొనసాగుతుందని తెలుపుతున్నాయి. వీటిని థర్మల్ స్కానర్లు, అత్యావసరమైన సామాగ్రి కొనుగోలుకు ఉపయోగించనున్నారు."
- సోనాలిని ఖేత్రపాల్, ఆరోగ్య నిపుణులు ఏడీబీ
ఏప్రిల్ 28న కేర్స్ (యాక్టివ్ రెస్పాన్స్ అండ్ ఎక్స్పెండిచర్ సపోర్ట్) కార్యక్రమంలో భాగంగా కరోనా కట్టడికి భారత్కు రూ. 11,400 కోట్లు (1.5 బిలియన్ డాలర్)ల రుణాన్ని మంజూరు చేసింది ఏడీబీ.
ఫిలిప్పీన్స్ రాజధాని మనీలా కేంద్రంగా ఉన్న ఏడీబీ, కోవిడ్-19 యాక్టివ్ రెస్పాన్స్ అండ్ ఎక్స్పెండిచర్ సపోర్ట్(కేర్స్) కార్యక్రమం ద్వారా 80 కోట్ల మంది ప్రజలకు నేరుగా సాయం చేస్తున్నట్లు ప్రకటించింది. వేల కుటుంబాలు, నిరు పేదలు, రైతులు, ఆరోగ్య కార్యకర్తలు, దివ్యాంగులకు మెరుగైన ఆరోగ్య సదుపాయాలు కల్పించేందుకు వీటిని వినియోగించవచ్చని పేర్కొంది.
20 బిలియన్ డాలర్లతో కొవిడ్-19 పాండెమిక్ రెస్పాన్స్ ఆప్షన్ను(సీపీఆర్ఓ) కరోనాపై పోరు కోసం ఏప్రిల్ 13న ఏర్పాటు చేసింది ఏడీబీ. సభ్యదేశాలకు ఆర్థిక సాయం అందించనున్నట్లు ప్రకటించింది. దీని ద్వారానే కేర్స్ కార్యక్రమం నిర్వహిస్తోంది.
ఇదీ చూడండి: భారత్కు ఏడీబీ రూ.11,400 కోట్ల సాయం
