కేంద్ర ప్రభుత్వం తీసుకొచ్చిన నూతన పన్ను విధానంపై 81 శాతం మంది ఆర్థిక, మానవ వనరుల (హెచ్ఆర్) విభాగ నిపుణులు అసంతృప్తిగా ఉన్నారని ఓ సర్వే తెలిపింది. ఈ నూతన పన్ను స్లాబుల వల్ల తమ ఉద్యోగులకు ఏ మాత్రం ప్రయోజనం చేకూరదని వారు అభిప్రాయపడుతున్నట్లు పేర్కొంది.
ఆర్థికమంత్రి నిర్మలా సీతారామన్ 2020-21 కేంద్ర బడ్జెట్లో ఈ నూతన పన్ను స్లాబులను ప్రతిపాదించారు. ఇవి కూడా ఐచ్ఛికమేనని స్పష్టం చేశారు. ప్రముఖ మానవ వనరుల సర్వే సంస్థ మెర్సర్... ఈ నూతన పన్ను స్లాబుల గురించి 119 కంపెనీలకు చెందిన హెఆర్ అధికారులను, ఆర్థిక నిపుణుల అభిప్రాయాలు సేకరించింది.
ఇబ్బందులు వస్తాయ్!
మెర్సర్ సర్వే ప్రకారం... సంవత్సర ఆదాయం రూ.5 లక్షల నుంచి రూ.10 లక్షలు; రూ.10 లక్షల నుంచి రూ.25 లక్షలు ఉన్న వారికి కొత్త పన్ను విధానం వల్ల ఇబ్బందులు వస్తాయని 60 శాతం మంది భావిస్తున్నారు.
అలాగే ఈ నూతన పన్ను విధానం... ఉద్యోగుల పదవీ విరమణ సేవింగ్స్పై ప్రతికూల ప్రభావం చూపవచ్చని 80 శాతం మంది యజమానులు భావిస్తున్నారు. దీని వల్ల యాజమాన్యాలు ఇచ్చే స్వచ్ఛంద ఆర్థిక ప్రయోజనాలు తీసుకునేందుకు ఉద్యోగులు దూరంగా ఉంటారని, ఎక్కువ ఆదాయం పొందేవారు తమ పెట్టుబడులను ఇతర మార్గాల్లోకి మళ్లిస్తారని అభిప్రాయపడ్డారు.
ఇదో సవాల్
కొత్త పన్ను విధానం గురించి తమ ఉద్యోగులకు చెప్పడం పెద్ద సవాల్గా మారిందని కంపెనీల మానవవనరుల విభాగధిపతులు భావిస్తున్నారని మెర్సర్ సర్వే తెలిపింది. రెండు ఆదాయపు పన్ను విధానాలను నిర్వహించడం కూడా ఆర్థికంగా భారం అవుతుందని భావిస్తున్నట్లు వెల్లడించింది.
ఈ నూతన పన్ను స్లాబు విధానాన్ని 30 శాతం కంటే తక్కువ మంది ఉద్యోగులే ఎంచుకునే అవకాశం ఉందని 83 శాతం మంది నిపుణులు అభిప్రాయపడుతున్నట్లు సర్వే తెలిపింది.
ఇదీ చూడండి:కరోనాపై భారత్ భారీ యుద్ధం- త్రివిధ దళాలకు బాధ్యత
