'బడ్జెట్​పై 45శాతం మంది అసంతృప్తి'

సాధారణ ప్రజలను ఆకట్టుకోవడంలో కేంద్ర బడ్జెట్ విఫలమైనట్లు ఓ సర్వేలో వెల్లడైంది. 45శాతం మంది ఈ బడ్జెట్​ పట్ల సంతృప్తిగా లేరని స్పష్టమైంది. జీవన ప్రమాణాలు క్షీణించడం, ఖర్చుల భారం పెరుగుతుందన్న ఆందోళనలతో ప్రజలు ఉన్నట్లు తేలింది. మోదీ సర్కార్ పనితీరు అంచనాలతో పోలిస్తే దారుణంగా ఉందని సర్వేలో పాల్గొన్నవారు అభిప్రాయపడ్డారు.

కేంద్ర బడ్జెట్ సాధారణ పౌరులను సంతృప్తిపరచలేదని ఓ సర్వేలో వెల్లడైంది. తాజా బడ్జెట్ వల్ల ధరలు పెరుగుతాయన్న ఆందోళనతో ప్రజలు ఉన్నట్లు తేలింది. ఈ మేరకు నిర్వహించిన పోల్​లో 45శాతం మంది బడ్జెట్​తో సంతృప్తి చెందలేదని తెలిపారు. 35.8శాతం మంది మాత్రం పద్దును స్వాగతించారు. గతేడాది నిర్వహించిన ఇదే తరహా పోల్​లో 64.2శాతం మంది అప్పటి బడ్జెట్​కు మద్దతిచ్చారు.

తాజా సర్వేలో 1,200మంది పాల్గొన్నారు. సర్వే ప్రకారం ధరలు తగ్గే అవకాశం లేదని 46.1శాతం మంది ప్రజలు పేర్కొన్నారు. 18.1శాతం మంది మాత్రం కొంతమేర తగ్గుతాయని అభిప్రాయం వ్యక్తం చేశారు.

ఇదీ చదవండి:బడ్జెట్​లో వేతన జీవులకు షాక్​!

గత ఏడాది కాలంలో తమ జీవన ప్రమాణాలు తీవ్రంగా పడిపోయాయని సర్వేలో పాల్గొన్న 50.7 శాతం మంది తెలిపారు. వచ్చే ఏడాది పరిస్థితులు మెరుగవుతాయని 27.6 శాతం మంది ఆశిస్తుండగా.. జీవన ప్రమాణాలు మరింత దిగజారే అవకాశం ఉందని 29 శాతం మంది ఆందోళన వ్యక్తం చేశారు.

ఖర్చులు పెరుగుతాయ్

బడ్జెట్ వల్ల నెలవారీ ఖర్చులు మరింత పెరుగుతాయని 56.4 శాతం మంది అభిప్రాయపడ్డారు. మరో 16.1 శాతం మంది మాత్రం.. ఎక్కువ ఆదా చేసేందుకు ఈ బడ్జెట్ సహకరిస్తుందని చెప్పారు.

ఇదీ చదవండి:బడ్జెట్​లో కొత్త సుంకాలు- ఏ వస్తువుపై ఎంత?

వచ్చే ఏడాది కాలంపాటు రోజువారీ ఖర్చుల నిర్వహణ కష్టంగా మారుతుందని 49.7 శాతం మంది తెలిపారు. మరోవైపు, ఖర్చులు పెరిగినా.. వాటి నిర్వహణకు డోకా ఉండదని 34 శాతం మంది అభిప్రాయపడ్డారు.

మోదీ పనితీరుపై..

ప్రధానమంత్రి నరేంద్ర మోదీ, ఆర్థిక మంత్రి నిర్మలా సీతారామన్ బృందం పనితీరుపైనా సర్వే ప్రశ్నలు సంధించింది. 36.4 శాతం మంది వీరి పనితీరు అంచనాల కన్నా దారుణంగా ఉందని చెప్పారు. 25.1 శాతం మంది అనుకున్న దానికంటే ఉత్తమంగా పనిచేశారని పేర్కొనగా.. అంచనాలకు తగ్గట్లే పనితీరు ఉందని 27.6 శాతం మంది అభిప్రాయం వెల్లడించారు.

2019లో రెండోసారి అధికారం చేపట్టిన నరేంద్ర మోదీ ప్రభుత్వానికి ఇదే అత్యల్ప స్కోరు కావడం గమనార్హం.