కన్నడనాట రాజకీయాలు రోజుకో మలుపు తిరుగుతున్నాయి. 'ఆపరేషన్ కమల'కు సంబంధించిన ఆడియో టేపులపై ముఖ్యమంత్రి హెచ్డీ కుమారస్వామి ప్రత్యేక దర్యాప్తు బృందం(సిట్) ఏర్పాటుకు ఆదేశించారు. ఈ నేపథ్యంలో రాష్ట్రంలో రాజకీయ వేడి మరింత పెరిగింది. శాసనసభ స్పీకర్ రమేశ్ కుమార్ సూచన మేరకు ఆడియో టేపుల్లోని నిజానిజాలను నిగ్గు తేల్చేందుకు సిట్ను ఏర్పాటు చేస్తున్నట్లు ముఖ్యమంత్రి ప్రకటించారు.
" స్పీకర్ సూచన మేరకే సిట్ ఏర్పాటు చేశాం. ఆయనను కూడా సిట్ విచారించనుండటం నన్ను బాధిస్తోంది."
- హెచ్డీ కుమారస్వామి, కర్ణాటక ముఖ్యమంత్రి
ఈ ఆరోపణల్లో భాగమైనందున శాసనసభ స్పీకర్ రమేశ్ను కూడా సిట్ విచారించాలని భాజపా నేతలు పట్టుబట్టారు. అప్పుడే తమకు నమ్మకం కలుగుతుందని కమలం పార్టీ నేతలు డిమాండ్ చేశారు.
స్పీకర్ తనను విచారించేందుకు స్వయంగా అనుమతించడం వల్ల ఆయనను కూడా ప్రశ్నించేందుకు వీలుగా సిట్ను ఏర్పాటు చేస్తున్నట్లు కుమారస్వామి ప్రకటించారు. 15 రోజుల్లోగా నిజానిజాలేంటో నిగ్గుతేల్చాలని అధికారులను ఆదేశించారు.