క్రికెట్ పండుగకు సర్వం సిద్ధమవుతోంది. ప్రపంచకప్-2019కు ఇంగ్లండ్, వేల్స్ సంయుక్తంగా అతిథ్యమిస్తున్నాయి. దీనికి సంబంధించిన టికెట్లు మార్చి 21 నుంచి 'సీడబ్యూసీ 19 టికెటింగ్ వెబ్సైట్'లో అందుబాటులో ఉండనున్నాయి. 8 లక్షల టికెట్లకు 30 లక్షల మందికి పైగా దరఖాస్తు చేసుకున్నారు.
జూన్ 16న మాంచెస్టర్లో జరిగే ఇండో-పాక్ పోరు కోసం క్రీడాభిమానులు ఆసక్తిగా ఎదురుచూస్తున్నారు. ఈ మ్యాచ్ టికెట్లకు విపరీతమైన గిరాకీ ఏర్పడింది. 25 వేల సిట్టింగ్ సామర్థ్యం ఉన్న ఈ స్టేడియానికి 4లక్షలకు పైగా దరఖాస్తులు వచ్చాయి.
భారత్-పాక్ మ్యాచ్కు అత్యధిక సంఖ్యలో 4 లక్షలకు పైగా దరఖాస్తులు వచ్చాయి. ఇది చాలా పెద్ద సంఖ్య. ఎక్కువ మంది దీన్ని చూసి నిరుత్సాహ పడుతున్నారు. లార్డ్స్లో జరిగే ఆస్ట్రేలియా-ఇంగ్లండ్ మ్యాచ్ కన్నా దీనికే డిమాండ్ ఎక్కువగా ఉంది. ---స్టీవ్ ఎల్లర్టి, ఐసీసీ వరల్డ్ కప్ డైరెక్టర్
నకిలీ వెబ్సైట్లో ఈ టోర్నీ టికెట్లను అమ్మేవారి పైనా దృష్టిపెట్టింది ఐసీసీ. ధ్రువీకృత వెబ్సైట్లో మాత్రమే అందుబాటులో ఉండనున్నాయని అభిమానులకు సూచించింది. ప్రత్యేక విభాగాన్ని ఏర్పాటు చేసి టికెట్ల ధరలను పర్యవేక్షిస్తోంది.
మొదటగా వచ్చే వారికే మొదటి టికెట్ అమ్మడం అనే పద్ధతిని అవలంబిస్తోంది ఐసీసీ. ఈ మెగాటోర్నీకి హాజరు కావాలనుకునేవారు ఎంత తొందరగా వెళితే అంత త్వరగా వాటిని దక్కించుకోవచ్చు.