28వ సుల్తాన్ అజ్లాన్ షా కప్లో ఆసియా క్రీడల ఛాంపియన్ జపాన్ను భారత పురుషుల హాకీ జట్టు ఢీకొట్టనుంది. మలేషియాలోని ఇపో వేదికగా మార్చి 23 నుంచి జరిగే ఈ టోర్నీకి.. సారథి మన్‌ప్రీత్‌ సింగ్‌ ఆధ్వర్యంలోని జట్టు సిద్ధమైంది.
ఆరు జట్ల మధ్య లీగ్, నాకౌట్‌ పద్ధతిలో జరిగే ఈ టోర్నీలో... భారత్ సహా ఆతిథ్య మలేసియా, ఆసియా క్రీడల ఛాంపియన్ జపాన్, దక్షిణ కొరియా, కెనడా, పోలండ్‌ దేశాలు పాల్గొంటున్నాయి.
తొలి రోజు మ్యాచ్లో జకార్తా ఆసియా క్రీడల విజేత జపాన్తో భారత్ ఆడనుంది. గతంలో జపాన్-భారత్ ఐదు మ్యాచ్ల్లో తలపడితే... ఐదుసార్లు భారత్‌నే విజయం వరించింది. ఈ మ్యాచ్ తర్వాత మార్చి 24న దక్షిణ కొరియాతో, 26వ తేదీన మలేసియాతో, 27న కెనడాతో, 29న పోలాండ్‌తో భారత్ ఆడనుంది.
2018 టోర్నీలో భారత్ ఐదో స్థానంతో సరిపెట్టుకుంది. 36 ఏళ్లలో భారత్ ఐదుసార్లు విజేతగా, రెండుసార్లు రన్నరప్‌గా నిలిచింది. ఏడుసార్లు కాంస్యంతోనే సరిపెట్టుకుంది. ఈనెల 30న ఫైనల్‌ జరుగనుంది.
