జులై 1 నుంచి ఆర్​టీజీఎస్​, నెఫ్ట్​ ఛార్జీలు తగ్గింపు

ఆర్టీజీఎస్, ఎన్‌ఈఎఫ్‌టీ(నెఫ్ట్‌)ల ద్వారా జరిపే నగదు బదిలీలపై జులై 1 నుంచి ఎలాంటి రుసుములు విధించబోమని రిజర్వు బ్యాంకు ప్రకటించింది. ఈమేరకు బ్యాంకులు అన్నింటికీ ఆదేశాలు జారీ చేసింది. అయితే... ఆ లావాదేవీలపై బ్యాంకులు వేసే ఛార్జీలు కొనసాగనున్నాయి.

డిజిటల్‌ లావాదేవీలను మరింత ప్రోత్సహించేలా రిజర్వు బ్యాంకు మంగళవారం కీలక ప్రకటన చేసింది. వచ్చే నెల 1 నుంచి ఆన్‌లైన్‌లో ‘రియల్‌ టైమ్‌ గ్రాస్‌ సెటిల్‌మెంట్‌ సిస్టమ్‌(ఆర్‌టీజీఎస్‌)’, ‘నేషనల్‌ ఎలక్ట్రానిక్‌ ఫండ్స్‌ ట్రాన్స్‌ఫర్‌(నెఫ్ట్‌)’ ద్వారా జరిపే నగదు బదిలీలపై రుసుములేవీ వసూలు చేయబోమని వెల్లడించింది. కాబట్టి బ్యాంకులు కూడా వినియోగదారుల నుంచి ఆ రుసుములు వసూలు చేయొద్దని, అదే రోజు నుంచి వారికి సంబంధిత ప్రయోజనాన్ని బదిలీ చేయాలని ఆదేశించింది.

సాధారణంగా ఆర్‌టీజీఎస్‌, నెఫ్ట్‌ ద్వారా జరిగే లావాదేవీలకు బ్యాంకుల నుంచి ఆర్‌బీఐ కనీస రుసుములు వసూలు చేస్తుంది. ఆ మొత్తాన్ని బ్యాంకులు వినియోగదారుల నుంచి వసూలు చేస్తాయి. ఇకపై ఆ ఛార్జీలను వసూలు చేయబోమని ఆర్​బీఐ ప్రకటించింది. ఆర్​టీజీఎస్​, నెఫ్ట్​పై బ్యాంకులు విధించే రుసుములు కొనసాగే అవకాశముంది.

భారీ మొత్తంలో నిధులను బదిలీ చేసేందుకు ఆర్‌టీజీఎస్‌, రూ.2 లక్షల్లోపు నగదును బదిలీ చేసేందుకు నెఫ్ట్‌ ఉపయోగపడతాయి. ప్రస్తుతం స్టేట్‌ బ్యాంక్‌ ఆఫ్‌ ఇండియా(ఎస్‌బీఐ) నెఫ్ట్‌ లావాదేవీలకు రూ.1 నుంచి రూ.5 వరకు, ఆర్‌టీజీఎస్‌ లావాదేవీలకు రూ.5 నుంచి రూ.50 వరకు వసూలు చేస్తోంది.

దేశంలో డిజిటల్‌ చెల్లింపుల్ని ప్రోత్సహించేందుకు నందన్‌ నీలేకని నేతృత్వంలోని కమిటీ పలు సిఫారసులు చేసింది. ఛార్జీలను ఎత్తివేయడం, ఎల్లవేళలా ఆర్‌టీజీఎస్‌, నెఫ్ట్‌ సదుపాయం అందుబాటులో ఉండేలా చూడటం, పాయింట్‌ ఆఫ్‌ సేల్‌ (పీఓఎస్‌) యంత్రాల దిగుమతులపై సుంకాల తొలగింపు లాంటి అంశాలను ఆ సిఫార్సుల్లో పొందుపరిచింది. అందుకు సంబంధించిన నివేదికను గత నెలలో ఆర్బీఐ గవర్నర్‌ శక్తికాంత దాస్‌కు నీలేకని కమిటీ అందజేసింది.