మూడేళ్ల తర్వాత గుర్తొచ్చిన గతం

మరచిపోయిన గతం మూడేళ్ల తర్వాత గుర్తొచ్చిందో బాలికకు. 13 ఏళ్ల వయసులో ఒడిశాలోని కొరాపుట్​ జిల్లాలో దొరికిన ఆ అమ్మాయి.. ఇప్పుడు బిహార్​లో ఉన్న తల్లిదండ్రుల వద్దకు చేరుకోబోతుంది.

13 ఏళ్ల బాలిక.. మూడేళ్ల క్రితం ఒడిశాలోని కొరాపుట్​ జిల్లాలో కనిపించింది. ఆ అమ్మాయికి గతం గుర్తులేదు. మూడు సంవత్సరాల తరవాత ఇప్పుడు అన్ని విషయాలను చెబుతోంది. బాలీవుడ్​ సినిమాలా ఉన్నా... ఈ సంఘటన నిజంగానే జరిగింది.

2016లో ఒడిశాలోని కొరాపుట్​ జిల్లాలోని రాలగాడ ప్రాంతంలో ఒంటరిగా తిరుగుతున్న 13ఏళ్ల బాలికను పోలీసులు గుర్తించారు. అప్పుడా బాలికకుగతం గుర్తుకు లేదు. తన స్వస్థలం, పేరు కూడా చెప్పలేని పరిస్థితిలో ఉంది. దీంతో పోలీసులు ఆమెను కొరాపుట్​ పిల్లల సంరక్షణ కమిటీ(సీడబ్ల్యూసీ)కి అప్పగించారు. అప్పటి నుంచి మిషనరీస్​ ఆఫ్​ ఛారిటీ ఆధ్వర్యంలోని ఆశ్రమంలో చికిత్స అందిస్తున్నారు.

మూడు సంవత్సరాల అనంతరం ఇప్పుడు ఆ బాలికకు గతం గుర్తుకువచ్చింది. తాను పుట్టింది బిహార్​లోని బోజ్​పూర్​ జిల్లా అని, బాల్య వివాహం జరిగి ఒక బిడ్డకు సైతం జన్మనిచ్చాననే చేదుగతాన్ని తనకు చెప్పినట్లు సీడబ్ల్యూసీ ఛైర్​పర్సన్​ గాయత్రి దేవీ తెలిపారు.

ఫోటోల ద్వారా గుర్తించిన తల్లిదండ్రులను సంప్రదించగా, వారు కూడా తమ బిడ్డనేనని అంగీకరించినట్లు తెలిపారు గాయత్రి. కుటుంబానికి అప్పగించిన అనంతరం బాలిక మంచి జీవితాన్ని గడిపేలా చర్యలు తీసుకుంటామని ఆమె చెప్పారు.