ఏపీ అసెంబ్లీలో అధికార, ప్రతిపక్షాల మధ్య మాటల తూటాలు

ఆంధ్రప్రదేశ్​ శాసనసభా కార్యకలాపాలు పూర్తిస్థాయిలో మొదలైన మొదటి రోజే.. మాటల తూటాలు పేలాయి. స్పీకర్ ఎన్నికను అభినందించేందుకు మొదలైన చర్చ.. పార్టీ ఫిరాయింపుల వరకూ వెళ్లింది. ఈ సందర్భంగా సభానాయకుడు జగన్- ప్రతిపక్ష నేత చంద్రబాబు మధ్య వాడీ వేడీ వాదన నడిచింది.

ఆంధ్రప్రదేశ్​ అసెంబ్లీ సమావేశాలు అధికార, ప్రతిపక్ష సభ్యుల విమర్శలు, ప్రతి విమర్శలతో వేడెక్కాయి. సభాపతికి నేతల అభినందనలతో మొదలైన శాసనసభ.. వాడీ వేడీ వాగ్వాదానికి దారితీసింది. కిందటి సభలో నిబంధనలకు విరుద్ధంగా వ్యవహరించారని.. ఈ సభలో సంప్రదాయాలను నెలకొల్పాలని అధికారపక్ష సభ్యులు సూచించారు. ఈ క్రమంలో.. కిందటి తెదేపా ప్రభుత్వం వైకాపా ఎమ్మెల్యేలను చేర్చుకున్న విషయాన్ని ప్రస్తావించారు. వారిపై చర్యలు తీసుకోకుండా.. కాలయాపన చేశారని విమర్శించారు. దీనిపై ప్రతిపక్షనేత చంద్రబాబు మాట్లాడుతూ.. ముఖ్యమంత్రి జగన్ మోహన్​రెడ్డి తండ్రి వైఎస్​కు కూడా పార్టీ మారిన చరిత్ర ఉందని.. అది తెలుసుకోవాలని సూచించారు. స్పీకర్​ను అభినందించే విషయాన్ని తప్పుదారి పట్టించారని అసంతృప్తి వ్యక్తం చేశారు. దీనిపై సీఎం ఆవేశంగా స్పందించారు. సభలో చరిత్రలు చెప్పొద్దని... కిందటి సభలో తమ పట్ల దాష్టీకంగా వ్యవహరించారని చెప్పారు. 23 మంది ఎమ్మెల్యేలను తమవైపు తిప్పుకుని.. కనీసం వారిపై అనర్హత వేటు వేయాలన్నా పట్టించుకోలేదని ధ్వజమెత్తారు.

ఇదీ చూడండి :అంతర్జాతీయ తైక్వాండో ఛాంపియన్ షిప్ ప్రారంభం