'వారాంతానికి 10లక్షలకుపైగా కరోనా కేసులు'

ఈ వారం ముగిసే సరికి భారత్​లో కరోనా కేసుల సంఖ్య 10లక్షలు దాటుతుందని తెలిపారు కాంగ్రెస్​ అగ్రనేత రాహుల్​ గాంధీ. వైరస్​ వ్యాప్తి కట్టడికి ప్రభుత్వం సరైన చర్యలు చేపట్టకపోతే పరిస్థితులు అత్యంత దారుణంగా ఉంటాయని డబ్ల్యూహెచ్​ఓ సారథి​ చేసిన హెచ్చరికలను ట్వీట్​కు జత చేశారు.

దేశంలో కరోనా కేసులు రోజురోజుకు పెరుగుతున్నాయని ఆందోళన వ్యక్తం చేశారు కాంగ్రెస్​ అగ్రనేత రాహుల్​ గాంధీ. ఈ వారం ముగిసే సరికి భారత్​లో మొత్తం కేసుల సంఖ్య 10లక్షలకు పైనే ఉంటుందని ట్వీట్​ చేశారు. వైరస్​ వ్యాప్తిని నిలువరించేందుకు ప్రభుత్వాలు కట్టుదిట్టమైన చర్యలు చేపట్టకపోతే ప్రపంచవ్యాప్తంగా అత్యంత దారుణ స్థితి నెలకొంటుందని డబ్ల్యూహెచ్​ఓ సారథి​ టెడ్రోస్​ అధనోమ్​ చేసిన వ్యాఖ్యలను ట్వీట్​కు జత చేశారు రాహుల్​.

అధనోమ్​ ఏమన్నారు?

కొన్ని ప్రభుత్వాలు కరోనా వైరస్​కు సంబంధించి ప్రజలకు మిశ్రమ సందేశాలను పంపుతున్నాయని సోమవారం ఆరోపించారు అధనోమ్​. కరోనా కట్టడిలో విఫలమైన నాయకుల కారణంగా సమీప భవిష్యత్తులో సాధారణ పరిస్థితులు నెలకొనే అవకాశాలు ఉండవని హెచ్చరించారు.

భారత్​లో కరోనా కేసుల సంఖ్య విపరీతంగా పెరుగుతోంది. 8 లక్షల కేసుల నుంచి 3 రోజుల వ్యవధిలోనే 9 లక్షల మార్కును అధిగమించింది. మొత్తం మరణాల సంఖ్య 23వేల 727కి పెరిగింది.

దేశంలో కరోనా పరిస్థితిపై కేంద్రాన్ని సోమవారం ప్రశ్నించారు రాహుల్ గాంధీ. ప్రభుత్వం సరైన చర్యలు చేపట్టనందు వల్లే కేసులు పెరుగుతున్నాయని విమర్శించారు.