ఈ బిచ్చగాడు..లక్షాధికారి! అనంతపురం జిల్లా గుంతకల్లు మస్తానయ్య దర్గా వద్ద బషీర్ సాహెబ్ (75) అనే యాచకుడు మృతి చెందాడు. ఈ రోజు ఉదయం మస్తానయ్య దర్గాలో అచేతనంగా పడి ఉన్న బషీర్ సాహెబ్ను గమనించిన తోటి యాచకులు అనుమానం వచ్చి దగ్గరికి వెళ్ళి చూడగా యాచకుడు అప్పటికే మృతి చెందాడు. పోలీసులకు సమాచారం అందించారు. ఘటనా స్థలానికి చేరుకున్న పోలీసులు మృతుని వివరాలు ఆరా తీయగా బషీర్ సాహెబ్ 12 నెలల నుంచి దర్గా పరిసరాల్లోనే జీవనం సాగిస్తున్నాడని స్థానికులు తెలిపారు.
అనాథ శవంగా పరిగణించిన పోలీసులు సమాచారం కోసం అతడు ఉంటున్న గదిని పరిశీలించారు. గదిని పరిశీలించిన పోలీసులు అవాక్కయ్యారు. వివరాలు దొరకలేదు కానీ అక్షరాలా రూ. 3 లక్షల 22 వేల 672 నగదు పోలీసులకు లభ్యమైంది. ఈ దృశ్యాన్ని చూసి పోలీసులు, స్థానికులు ఆశ్చర్యానికి గురయ్యారు. ఈ మొత్తం సమాచారాన్ని పోలీసులు జిల్లా ఉన్నతాధికారులకు తెలిపి, మృతదేహాన్ని పోస్టుమార్టం నిమిత్తం ప్రభుత్వ ఆసుపత్రి కి తరలించారు.
