ఎంసెట్​ ఇంజినీరింగ్​ కౌన్సెలింగ్​ షెడ్యూల్​ వచ్చేసింది

ఎంసెట్​ ఇంజినీరింగ్​ కౌన్సెలింగ్​ షెడ్యూల్​ ఖరారైంది. ఈ నెల 24 నుంచి జులై 12 వరకు ఈ ప్రక్రియ కొనసాగనుంది. ఈ సారి కౌన్సెలింగ్​లో స్లాట్​ బుకింగ్​ విధానాన్ని ప్రవేశపెట్టారు. ధ్రువపత్రాల పరిశీలనకు ఎప్పుడు వెళ్ళాలో విద్యార్థులే నిర్ణయం తీసుకునే అవకాశాన్ని అధికారులు కల్పించారు.

ఎంసెట్​ ఇంజినీరింగ్​ విభాగంలో ఉత్తీర్ణులైన ఇంటర్​ ఎంపీసీ విద్యార్థులు బీటెక్​, బీఫార్మసీ, ఫార్మా-డీ కోర్సుల్లో ప్రవేశానికి ఈ నెల 24 నుంచి కౌన్సెలింగ్​ ప్రారంభం కానుంది. మెదటి విడత ప్రక్రియ జులై 12 తో ముగియనుంది. పూర్తి వివరాలను ఈనెల 24 న tseamcet.nic.in వెబ్​సైట్​లో పొందుపర్చనున్నట్లు అధికారులు తెలిపారు.

షెడ్యూల్​ ఇదిగో...

గడువు	ప్రక్రియ
24 నుంచి జులై1	ప్రాథమిక సమాచారం పూర్తి చేయటం, ప్రాసెసింగ్​ రుసుం చెల్లించటం, ధ్రువపత్రాల పరిశీలనకు సహాయ కేంద్రాన్ని, తేదీని, సమయాన్ని ఎంపికచేసుకోవడానికి స్లాట్​ బుక్​ చేసుకోవటం
27 నుంచి జులై 3	ధ్రువ పత్రాల పరిశీలన
27 నుంచి జులై 4	కళాశాలలు, కోర్సులను ఎంపిక చేసుకోవడానికి ఆప్షన్లు ఇచ్చుకోవటం
జులై 6న	సీట్ల కేటాయింపు
జులై 6 నుంచి 12

వెబ్​సైట్​ ద్వారా సెల్ఫ్ రిపోర్టింగ్​, ట్యూషన్​ రుసుం చెల్లించటం

అంతా మీ ఇష్టమే...!

గతేడాది వరకు ఏ ర్యాంకు వారు ఏ రోజు ధ్రువపత్రాల పరిశీలనకు హాజరుకావాలో అధికారులే నిర్ణయించేవారు. ఈసారి మాత్రం పాలిసెట్​లో అమలు చేసిన స్లాట్​ బుకింగ్​ విధానాన్నే ఇంజినీరింగ్​ కౌన్సెలింగ్​లోనూ ప్రవేశపెట్టనున్నారు. ధ్రువపత్రాల పరిశీలనకు ఏ రోజు, ఏ కేంద్రానికి, ఏ సమయంలో వెళ్తారో ముందుగానే వెబ్​సైట్​లో స్లాట్​ బుక్​ చేసుకోవచ్చు. ప్రతీ రెండు గంటలకు ఒక స్లాట్​ ఉంటుంది. దాంతో ఒక విద్యార్థికి ధ్రువపత్రాల పరిశీలన 2 గంటలకు మించి పట్టదని అధికారులు చెబుతున్నారు.

ఇవీ చూడండి: వైభవంగా... కాళేశ్వర గంగ ఉప్పొంగంగా...!