మోదీ బయోపిక్​ చూసిన ఈసీ బృందం

ప్రధానమంత్రి నరేంద్రమోదీ జీవితం ఆధారంగా రూపొందించిన చిత్రాన్ని ఎన్నికల సంఘం అధికారులు చూశారు. సినిమా చూసి నిషేధించాలో లేదో నిర్ణయం తీసుకోవాలని తాజాగా సుప్రీం కోర్టు ఆదేశించింది.

సుప్రీం కోర్టు ఆదేశాల మేరకు ప్రధానమంత్రి మోదీ జీవితంగా ఆధారంగా రూపొందిన ' పీఎం నరేంద్ర మోదీ' చిత్రాన్ని ఎన్నికల సంఘం అధికారులు బుధవారం వీక్షించారు. సినిమా చూసి నిషేధంపై నిర్ణయం తీసుకోవాలని సుప్రీం సోమవారం తీర్పునిచ్చింది. ఇదే విషయమై ప్రత్యేక ప్రదర్శనకు ఏర్పాటు చేయాలని నిర్మాతలను కోరింది ఎన్నికల పరిశీలనా బృందం. సినిమా చూసిన అనంతరం సుదీర్ఘంగా అధికారులు చర్చించారని సమాచారం. చర్చల సారాంశాన్ని ఈ నెల 19న సుప్రీంకోర్టుకు సీల్డ్​ కవర్​లో అందజేయనుంది.

ఎన్నికల వేళ ఎలాంటి బయోపిక్​లకు అవకాశం లేదని సినిమాపై ఈనెల​ 10న నిషేధం విధించింది ఈసీ. ఈ నిర్ణయాన్ని సవాల్ చేస్తూ నిర్మాతల తరఫున సీనియర్​ న్యాయవాది ముకుల్ రోహత్గి వ్యాజ్యం దాఖలు చేశారు. పూర్తి సినిమా చూడకుండా నిర్ణయం ఎలా తీసుకుంటారని వ్యాజ్యంలో పేర్కొన్నారు.

దీనిపై స్పందించిన సుప్రీం ప్రధాన న్యాయమూర్తి జస్టిస్​ రంజన్​ గొగొయి, జస్టిస్​ దీపక్​ గుప్తా, జస్టిస్ సంజీవ్ ఖన్నాలతో కూడిన ధర్మాసనం ఈసీకి మార్గదర్శకాలు జారీ చేసింది. ​

బాలీవుడ్​ నటుడు వివేక్​ ఒబెరాయ్​ ప్రధాన పాత్రలో ఒమంగ్​ కుమార్​ దర్శకత్వంలో 'పీఎం నరేంద్రమోదీ' చిత్రం తెరకెక్కింది.

ఇదీ చూడండి: ఈసీకి రాహుల్​, మోదీలపై ఫిర్యాదులు