ఆసరా పింఛన్లు పెరిగాయ్... జులై నుంచి చేతికి

ఆసరా పింఛన్లు పెంచుతామని అసెంబ్లీ ఎన్నికల సమయంలో సీఎం కేసీఆర్ ఇచ్చిన హామీ వచ్చే నెల నుంచి అమల్లోకి రానుంది. పింఛన్లు పెంచుతూ ప్రభుత్వం ఉత్తర్వులు జారీ చేసింది.

పెరిగిన ఆసరా పింఛన్లు వచ్చే నెల నుంచి అమల్లోకి రానున్నాయి. లబ్ధిదారులు జులై నెలలో పెరిగిన పింఛన్లు అందుకుంటారు. ఈ మేరకు రాష్ట్ర ప్రభుత్వం ఉత్తర్వులు జారీ చేసింది. ఆసరా పథకం కింద ఇచ్చే సామాజిక పింఛన్ల మొత్తాన్ని రెట్టింపు చేస్తామని శాసనసభ ఎన్నికల సమయంలో కేసీఆర్ హామీ ఇచ్చారు. వృద్ధాప్య పింఛన్ల వయసును 60 నుంచి 57 ఏళ్లకు తగ్గించారు. అందుకు అనుగుణంగా ఓటాన్ అకౌంట్ బడ్జెట్ లో నిధులు కేటాయించారు.

పెరిగిన లబ్ధిదారులు

అర్హత వయసు తగ్గించిన నేపథ్యంలో కొత్త లబ్ధిదారుల ఎంపిక కోసం గ్రామీణాభివృద్ధి శాఖ కసరత్తు చేసింది. కొత్తగా ఆరు లక్షలకు పైగా లబ్ధిదారులను గుర్తించారు. లోక్​సభ ఎన్నికల కోడ్ ఈ నెల 27తో ముగియడం వల్ల పెంచిన ఆసరా పింఛన్ల అమలుకు సంబంధించి ప్రభుత్వం ఉత్తర్వులు జారీ చేసింది. దివ్యాంగులకు నెలకు రూ.3,016, మిగతా వారికి నెలకు రూ.2,016 ఆసరా కింద అందించనున్నారు.

ఏటా 12వేల కోట్లు

పెరిగిన పింఛన్లు జూన్ నెల నుంచి అమల్లోకి వస్తాయని... లబ్ధిదారులకు జులైలో అందుతాయని రాష్ట్ర ప్రభుత్వం ఉత్తర్వుల్లో పేర్కొంది. ప్రస్తుతం రాష్ట్రంలో 39 లక్షలా 32 వేలా 309 మంది లబ్ధిదారులకు ఆసరా పింఛన్లు అందుతున్నాయి. కొత్తగా మరో ఆరు లక్షల 30 వేలకు పైగా లబ్ధి చేకూరనుంది. జూలై నుంచి రాష్ట్రంలో 46 లక్షలకు పైగా లబ్ధిదారులకు ఆసరా పింఛన్లు అందనున్నాయి. ఫింఛన్ల కోసం నెలకు వెయ్యి కోట్ల రూపాయల చొప్పున ఏడాదికి 12 వేల కోట్లు ప్రభుత్వం ఖర్చు చేయనుంది.

ఇదీ చూడండి: కేటీఆర్​కు తొమ్మిదో తరగతి విద్యార్థి ట్వీట్​