లఖ్నవూ విమానాశ్రయ ఘటనలో పలు రాజకీయ నేతలు ఉత్తర్ప్రదేశ్ మాజీ ముఖ్యమంత్రి అఖిలేష్‌కు మద్దతుగా నిలిచారు. విమానాశ్రయ పోలీసులు అఖిలేశ్ను అడ్డుకోవటంపై ఆగ్రహం వ్యక్తం చేశారు. భాజపా నాయకులు దేశంలో ప్రజాస్వామ్యానికి తూట్లు పొడుస్తున్నారని విమర్శించారు.
అఖిలేశ్ యాదవ్ అలహాబాద్‌ విశ్వవిద్యాలయ విద్యార్థి నాయకుల ప్రమాణ స్వీకార కార్యక్రమానికి వెళుతుండగా ఎయిర్‌పోర్ట్‌ పోలీసులు అడ్డుకున్నారు. తిరిగి విమానం వెళ్లిపోయిన తరువాత అఖిలేశ్ను బయటకు పంపించారు.
ప్రయాగ్రాజ్ వెళ్లకుండా యూపీ పోలీసులు విమానాశ్రయంలోనే అడ్డుకోవడంపై అఖిలేష్ తీవ్ర ఆగ్రహం వ్యక్తం చేశారు. యోగి సర్కార్ 'కుట్ర' చేస్తోందంటూ మండిపడ్డారు. ఎలాంటి ఆదేశాలు లేకుండానే తనను అడ్డుకున్నారని ట్వీట్ చేశారు.
" ఏ రాతపూర్వక ఆదేశాలు లేకున్నా లఖ్నవూ విమానాశ్రయ అధికారులు నన్ను విమానం ఎక్కకుండా అడ్డుకున్నారు. విద్యార్థి సంఘం నాయకుడి ప్రమాణ స్వీకారానికి ప్రభుత్వం ఎంతలా భయపడుతుందో ఇప్పుడు స్పష్టమవుతోంది. మన దేశ యువత ఇలాంటి అన్యాయాన్ని సహించరని భాజపాకు తెలుసు. "
- అఖిలేశ్ యాదవ్, సమాజ్వాదీ పార్టీ అధినేత
పశ్చిమ్ బంగ ముఖ్యమంత్రి మమతా బెనర్జీ లఖ్నవూ పోలీసుల తీరును తప్పుబట్టారు. దేశంలో ప్రజాస్వామ్యం ఎక్కడుందని ప్రశ్నించారు.