Marriage With Transgender : ఇన్స్టాగ్రామ్లో పరిచయమైన ట్రాన్స్‌జెండర్తో ప్రేమలో పడ్డాడు ఓ యువకుడు. అనంతరం కుటుంబ సభ్యులను ఎదురించి మరీ పెళ్లి చేసుకున్నాడు. అయితే ఈ పెళ్లి ఇష్టంలేని యువకుడి కుటుంబ సభ్యులు.. ఇంటికొచ్చిన దంపతులపై దాడి చేశారు. అక్కడి నుంచి వారిని వెళ్లగొట్టి.. చంపేస్తామని బెదిరించారు. ట్రాన్స్‌జెండర్ నుంచి రూ.60 లక్షల కట్నం డిమాండ్ చేశారు. దీంతో బాధితులిద్దరు పోలీసులను ఆశ్రయించారు. బిహార్లో ఈ ఘటన జరిగింది.
పోలీసులు తెలిపిన వివరాల ప్రకారం.. రాజధాని పట్నాలోని దానాపుర్ ప్రాంతానికి చెందిన రవికి రెండు సంవత్సరాల క్రితం.. దర్భంగకు చెందిన అధికా చౌదరి అనే ఓ ట్రాన్స్‌జెండర్ ఇన్స్టాగ్రామ్లో పరిచయమైంది. వీరి పరిచయం కాస్త ప్రేమగా మారింది. వీరిద్దరు అప్పుడప్పుడు హోటళ్లలోనూ కలుసుకునేవారు. చివరగా వీరిద్దరు పెళ్లి చేసుకోవాలని నిర్ణయించుకున్నారు. అదే విషయాన్ని రవి కుటుంబ సభ్యులకు తెలిపారు. దీనికి వారు ఒప్పుకోలేదు. అనంతరం జున్ 25న.. స్థానికంగా ఉన్న ఓ గుడిలో వీరిద్దరూ వివాహం చేసుకున్నారు. పెళ్లి అనంతరం భార్యతో కలిసి ఇంటికెళ్లిన రవిపై అతడి కుటుంబ సభ్యులు దాడి చేశారు. అధికా చౌదరిపైనా దాడికి తెగబడ్డారు. ఇద్దరినీ ఇంట్లో నుంచి గెంటేశారు. రూ.60 లక్షలు కట్నం తెస్తేనే ఇంట్లోకి అడుగుపెట్టాలని అధికను బెదిరించారు. లేదంటే చెంపేస్తామని హెచ్చరించారు.