Young Farmer Suicide In Karnataka : పెళ్లి చేసుకునేందుకు అమ్మాయిని ఎవరూ ఇవ్వడం లేదని.. ఓ యువరైతు ఆత్మహత్యకు పాల్పడ్డాడు. పనుల కోసం పొలానికి వెళ్లి.. అక్కడే విషం తాగి ఆత్మహత్య చేసుకున్నాడు. ఈ ఘటన కర్ణాటకలోని హవేరి జిల్లాలో జరిగింది. పోలీసుల తెలిపిన వివరాల ప్రకారం.. బాదగి తాలూకాలోని మాసనగి గ్రామానికి చెందిన మంజునాథ్(36) అనే వ్యక్తి వ్యవసాయం చేస్తూ జీవిస్తున్నాడు. అయితే, గత ఎనిమిదేళ్లుగా పెళ్లి చేసుకునేందుకు ప్రయత్నాలు చేస్తున్నాడు మంజునాథ్. కానీ అతడికి అమ్మాయిని ఇచ్చేందుకు ఎవరూ ముందుకు రావడం లేదు. దీంతో మంజునాథ్ సహా అతడి తల్లిదండ్రులు కూడా తీవ్ర మనస్తాపానికి గురయ్యారు.
దీనిపై తీవ్రంగా ఆలోచించిన మంజునాథ్ జూన్ 15న మధ్నాహ్నం 2 గంటలకు విషం తాగాడు. దీనిని గమనించిన కుటుంబసభ్యులు, గ్రామస్థులు వెంటనే అతడ్ని హవేరి ప్రభుత్వ అసుపత్రికి తరలించారు. అక్కడ మంజునాథ్ పరిస్థితి మరింత విషమించడం వల్ల.. హుబ్బళ్లిలోని కిమ్స్ ఆసుపత్రికి తరలించారు. అయినా ఫలితం లేకపోయింది. చికిత్స పొందుతూ జూన్ 21న మంజునాథ్ కన్నుమూశాడు.
"మంజునాథ్ వ్యవసాయం చేస్తూ జీవనం సాగిస్తున్నాడు. 8 ఏళ్లుగా పెళ్లి ప్రయత్నాలు చేస్తున్నాడు. అయినా ఫలితం లేకపోయింది. దీంతో మనస్తాపం చెంది ఆత్మహత్యకు పాల్పడ్డాడు." అని పోలీసులు తెలిపారు. ఈ ఘటనపై కేసు నమోదు చేసుకుని దర్యాప్తు చేపట్టామని వారు వెల్లడించారు. తల్లిదండ్రులను బాగా చూసుకోలేకపోతున్నాని మంజునాథ్ నిత్యం బాధపడేవాడని గ్రామస్థులు తెలిపారు. కాగా కుమారుడి మృతిపై తల్లిదండ్రులు కన్నీరుమున్నీరై విలపిస్తున్నారు.
గత కొంతకాలంగా కర్ణాటకలో.. రైతులకు అమ్మాయిని ఇచ్చేందుకు ఎవరూ ముందుకు రావడం లేదని సమాచారం. 2023 కర్ణాటక అసెంబ్లీ ఎన్నికల సమయంలోనూ ఈ అంశం తీవ్ర చర్చనీయంగా మారింది.
పెళ్లి కావడం లేదని.. సాఫ్ట్వేర్ ఉద్యోగి ఆత్మహత్య..
కొంత కాలం క్రితం మహరాష్ట్ర రాజధాని ముంబయిలో సాఫ్ట్వేర్ ఉద్యోగం చేస్తున్న ఓ వ్యక్తి కూడా ఇలాగే ఆత్మహత్య చేసుకున్నాడు. ఎంతకీ తనకు పెళ్లికాకపోవడం వల్ల మనస్తాపానికి గురై ఉరివేసుకుని ఆత్మహత్య చేసుకున్నాడు. కంపెనీలో ఉద్యోగం, మంచి జీతం ఉన్నా.. చానాళ్లుగా పెళ్లికావడం లేదని ఈ ఘటనకు పాల్పడ్డాడు.
తెలంగాణకు చెందిన రాజ్కుమార్.. కామారెడ్డి జిల్లా సదాశివనగర్ మండలం అడ్లూర్ఎల్లారెడ్డి గ్రామ వాసి. ముంబయిలో సాఫ్ట్వేర్ ఉద్యోగిగా పనిచేసేవాడు. కొవిడ్ సమయంలో ఇంటికొచ్చి ఇక్కడి నుంచే పనిచేస్తున్నాడు. జీవితంలో స్థిరపడిన రాజ్కుమార్కు.. కుటుంబ సభ్యులు కొన్నాళ్లుగా పెళ్లి సంబంధాలు చూస్తున్నారు. అయినప్పటికీ ఏదీ కుదరడం లేదు. ఎప్పటికీ పెళ్లికాదని మనస్తాపం చెందిన రాజ్కుమార్.. ఇంట్లో దూలానికి ఉరివేసుకుని బలవన్మరణానికి పాల్పడ్డాడు. చేతికి అందొచ్చిన కుమారుడి మృతితో కుటుంబ సభ్యులు కన్నీరుమున్నీరుగా విలపించారు.
