Yogi Adityanath: ఉత్తర్‌ప్రదేశ్‌ ముఖ్యమంత్రి యోగి ఆదిత్యనాథ్‌కు సొంత మంత్రుల నుంచే వ్యతిరేకత వ్యక్తం అవుతోంది. ఇప్పటికే ఒక మంత్రి రాజీనామా చేయగా.. భాజపా పెద్దలను కలుసుకునేందుకు మరొక మంత్రి దిల్లీకి వెళ్లారు. భాజపా ప్రభుత్వాల్లో ఇలా సొంత నేతల నుంచే బహిరంగంగా వ్యతిరేకత వ్యక్తం కావడమనేది అరుదనే చెప్పాలి. అలాంటిది వరుసగా మూడు శాఖల మంత్రులు తమ అసంతృప్తిని వెళ్లగక్కారు. జలశక్తి శాఖ మంత్రి అయితే ఏకంగా కేంద్ర హోంమంత్రి అమిత్‌ షాకు రాజీనామా లేఖను పంపి, అవినీతి ఆరోపణలు చేశారు.
'నా సామాజిక వర్గం కారణంగా నాకు గౌరవం దక్కడం లేదు. ఒక మంత్రిగా నాకు ఎలాంటి అధికారం లేదు. నేను మంత్రిని కాబట్టి నాకో కారు ఇచ్చారు. నన్ను ఏ సమావేశానికి పిలవడం లేదు. నాకు ఏ పని అప్పగించడం లేదు. బదిలీల్లో అవినీతి చోటుచేసుకుంది. దాని గురించి అడిగితే సమాచారం ఇవ్వడం లేదు. నా శాఖ కార్యదర్శి నా మాట వినడం లేదు. నమామీ గంగ పథకంలో కూడా అవినీతి చోటుచేసుకుంటోంది. ఇవన్నీ నన్ను బాధకు గురిచేశాయి' అని ఆరోపిస్తూ జలశక్తి మంత్రి దినేశ్ కార్తీక్ రాజీనామా సమర్పించారు.