Woman Paraded In Rajasthan : రాజస్థాన్లోని ప్రతాప్గఢ్ జిల్లాలో దారుణం జరిగింది. గ్రామంలోని వేరే వ్యక్తితో మహిళ వివాహేతర సంబంధం పెట్టుకుందని ఆరోపిస్తూ.. వివస్త్రను చేసి నగ్నంగా ఊరేగించాడు ఆమె భర్త. అందుకు బాధితురాలి అత్తమామలు కూడా సహకరించారు. ఈ ఘటనకు సంబంధించిన వీడియో వైరల్ కావడం వల్ల విషయం బయటపడింది.
డీజీపీ ఉమేశ్ మిశ్రా తెలిపిన వివరాల ప్రకారం.. జిల్లాలోని ధరియావద్ పోలీస్స్టేషన్ పరిధిలో గురువారం ఈ ఘటన జరిగింది. సోషల్మీడియాలో వీడియో వైరల్ కావడం వల్ల శుక్రవారం సాయంత్రం పోలీసులకు విషయం తెలిసింది. వెంటనే జిల్లా ఎస్పీతోపాటు పోలీస్ సిబ్బంది గ్రామానికి చేరుకున్నారు. కేసు నమోదు చేసుకుని దర్యాప్తు ప్రారంభించారు.
Woman Paraded Rajasthan : "బాధితురాలికి ఏడాది కిత్రం వివాహమైంది. ఆమె గ్రామంలో మరో వ్యక్తితో వివాహేతర సంబంధం పెట్టుకుందని ఆమె అత్తమామలు, భర్త గత కొద్ది రోజులుగా ఆరోపిస్తున్నారు. గురువారం.. ఆమెను కిడ్నాప్ చేసి తమ గ్రామానికి తీసుకెళ్లి అత్తమామలు, భర్తే ఈ దారుణానికి పాల్పడ్డారు. బాధితురాలిని ఆమె భర్త.. గ్రామంలో కిలోమీటర్పాటు నగ్నంగా ఊరేగించాడు. బాధితురాలి భర్త తరఫున మరికొందరు బంధువులు కూడా ఈ ఘటనకు సహకరించారు" అని డీజీపీ తెలిపారు.
ఈ ఘటనకు సంబంధించి ముగ్గురు నిందితులను అరెస్ట్ చేసినట్లు ప్రతాప్గఢ్ ఎస్పీ అమిత్ కుమార్ తెలిపారు. నిందితులను పట్టుకునేందుకు పోలీసులు వెంబడించే క్రమంలో వారంతా గాయపడినట్లు చెప్పారు. వారు ప్రస్తుతం జిల్లా ఆస్పత్రిలో చికిత్స పొందుతున్నారని వెల్లడించారు.
కఠిన చర్యలు తీసుకుంటాం: సీఎం
ఈ ఘటనపై రాష్ట్ర ముఖ్యమంత్రి అశోక్ గహ్లోత్ స్పందించారు. నిందితులను వీలైనంత త్వరగా అరెస్ట్ చేస్తామని తెలిపారు. "ఈ ఘటనకు కారకులైన వారిపై కఠిన చర్యలు తీసుకోవాలని డైరెక్టర్ జనరల్ ఆఫ్ పోలీస్‌ను ఆదేశించాను. నాగరిక సమాజంలో ఇలాంటి నేరస్థులకు చోటు లేదు. ఈ నేరస్థులను వీలైనంత త్వరగా కటకటాల వెనక్కి నెట్టి శిక్షిస్తాము. ఫాస్ట్‌ట్రాక్ కోర్టులో విచారణ జరుగుతోంది" అని సీఎం అశోక్ గహ్లోత్.. ఎక్స్లో తెలిపారు.