జల్సాలకు బానిసైన చెల్లి.. చివరికి అక్క ఇంట్లోనే..

సరదాలకు అలవాటుపడిన ఓ మహిళ.. తన సొంత అక్క ఇంటినే దోచుకోవడానికి ప్రయత్నించింది. అయితే పథకం విఫలమై పోలీసులకు చిక్కింది. స్నేహితుడితో పాటు ఆమెను పోలీసులు అరెస్ట్ చేశారు. ఈ ఘటన దిల్లీ నగర శివారు ప్రాంతంలో జరిగింది.

పబ్​జీ, మద్యానికి బానిసైన ఓ మహిళ తన సొంత అక్క ఇంట్లోనే దొంగతనానికి ప్రయత్నించి.. పోలీసులకు చిక్కింది. ఇందుకు సాయం చేసిన తన స్నేహితుడిని కూడా పోలీసులు అరెస్ట్​ చేశారు. ఈ సంఘటన దిల్లీ నగర శివారులోని నిహాల్​ విహార్​ ప్రాంతంలో జరిగింది.

ఇదీ జరిగింది..

మద్యం, పబ్​జీకి బానిసైన జ్యోతి అనే మహిళ.. డబ్బు కోసం తన స్నేహితులు సన్నీ, సైఫ్​లతో కలిసి సొంత అక్క ఇంట్లోనే దొంగతనం చేయాలని భావించింది. ఇందులో భాగంగా తన అక్క(శశి)ఇంటికి ఇద్దరు మిత్రులను జ్యోతి పంపింది. వారిద్దరూ.. శశి భర్త పేరుతో ఇంట్లోకి ప్రవేశించారు. వారిలో ఒకరు తుపాకీ తీసి ఆమెను బెదిరించగా.. మరొకడు ఆమె నోరు నొక్కి పట్టుకున్నాడు. డబ్బు కోసం వెతకగా.. ఏమి దొరకలేదు. దీంతో శశిని నేల మీద పడేశారు. ఆమె అరవడంతో బయట తాళం వేసి పారిపోయారు. శశి కేకలకు అక్కడికి చేరుకున్న స్థానికులు.. ఆమెను బయటకు తీసుకొచ్చారు.

స్కూటర్​ కోసం వచ్చి..

ఈ ఘటనపై శశి ఫిర్యాదు మేరకు కేసు నమోదు చేసుకున్న పోలీసులు.. దర్యాప్తు ప్రారంభించారు. దీనిలో భాగంగా సీసీటీవీ ఫుటేజ్​ను పరిశీలించిన అధికారు.. నిందితులు ద్విచక్ర వాహనంపై వచ్చినట్లు గుర్తించారు. ఆ వాహనాన్ని ఘటన స్థలానికి 250 మీటర్ల దూరంలో పార్కు చేసినట్లు గమనించారు. దీంతో ఓ కానిస్టేబుల్​ను సివిల్​ డ్రెస్​లో ఆ ప్రాంతంలో ఉంచారు. కొంత సమయం తర్వాత స్కూటర్​ కోసం వచ్చిన సన్నీ.. పోలీసులకు చిక్కాడు.

సన్నీని విచారించగా విషయాన్ని చెప్పాడు. దీంతో జ్యోతిని కూడా అరెస్ట్​ చేసినట్లు పోలీసులు తెలిపారు. పబ్​జీ ఆడుతుండగా.. ఐదు నెలల క్రితం సన్నీ, జ్యోతిలకు పరిచయం ఏర్పడిందని.. తమ సరదాలకు డబ్బులేక ఈ దారుణానికి పాల్పడ్డారని వెల్లడించారు.

ఇదీ చూడండి:Live Video: బైక్​లో దూరిన పాముపై కర్కశత్వం