రాజకీయ భవితవ్యంపై ఆజాద్ కీలక వ్యాఖ్యలు

'నేను ఇప్పుడు స్వేచ్ఛ జీవిని. ఎక్కడికైనా వెళ్తాను' అని వ్యాఖ్యానించారు కాంగ్రెస్​ సీనియర్​ నేత గులాం నబీ ఆజాద్​. దేశానికి సేవ చేయడం తన అదృష్టంగా భావిస్తున్నట్లు చెప్పారు. త్వరలో రాజ్యసభ సభ్యుడిగా పదవీ విరమణ చేయనున్న ఆజాద్​.. ఆ తర్వాత ఏ పదవిలోనూ ఉండబోనని పేర్కొన్నారు. దీంతో ఆయన రాజకీయలకు దూరంగా ఉంటారని తెలుస్తోంది.

రాజ్యసభ సభ్యుడిగా త్వరలో పదవీ విరమణ చేయనున్న కాంగ్రెస్ సీనియర్​ నేత గులాం నబీ ఆజాద్.. తన తుదిశ్వాస వరకు ప్రజలకు సేవ చేస్తూనే ఉంటానని పేర్కొన్నారు. పదవీ విరమణ తర్వాత ఎంపీగా, మంత్రిగా, పార్టీలో ఏ పదవిలోనూ ఉండాలనుకోవడం లేదన్నారు. దీంతో ఆయన రాజకీయలకు దూరంగా ఉంటారని తెలుస్తోంది. ప్రజలతో మమేకం కావడానికి, వారికి సేవ చేయడానికి స్వేచ్ఛగా ఎక్కడికైనా వెళ్తానని అన్నారు.

"1975లో జమ్ముకశ్మీర్ రాష్ట్ర యువజన​ కాంగ్రెస్​ అధ్యక్షుడిగా ఉన్నాను. పార్టీలో చాలా పదవులు చేపట్టాను. పలువురి ప్రధానులతో పని చేశాను. దేశానికి సేవ చేయడం నా అదృష్టంగా భావిస్తున్నాను. నా విధులను నిజాయితీగా నిర్వర్తించినందుకు సంతోషంగా ఉంది. ప్రపంచాన్ని దేశాన్ని అర్థం చేసుకునే అవకాశం లభించింది. రాజకీయవేత్తగా చేసిన సేవతో పూర్తిగా సంతృప్తిగా చెందాను. ఇప్పుడు నేను స్వేచ్ఛా జీవిని. ఎక్కడికైనా వెళ్తాను. చివరి శ్వాస వరకు ప్రజల సేవకే అంకితమవుతాను."

- గులాం నబీ ఆజాద్​, కాంగ్రెస్​ సీనియర్​ నేత

'పని పట్ల నా నిబద్ధతను చూసి.. లోతుగా అర్థం చేసుకున్నవాళ్లు భావోద్వేగానికి గురయ్యారు' అని పేర్కొన్నారు ఆజాద్​. తనపై భావద్వేగంతో ప్రశంసలు కురిపించిన ప్రధాని, రాష్ట్రపతి సహా సహచరులందరికీ ధన్యవాదాలు తెలిపారు.

కాంగ్రెస్​ పార్టీ, పార్టీ అధ్యక్ష పదవి గురించి ఆజాద్​ అభిప్రాయాన్ని అడగగా.. "పార్టీని ఎలా బలోపేతం చేయాలనే దానిపైనే ఆందోళన వ్యక్తం చేస్తున్నాను. అంతేగానీ ఎవరికీ వ్యతిరేకంగా కాదు" అని అన్నారు.

రాజ్యసభలో రాష్ట్రపతి ధన్యవాద తీర్మానం సందర్భంగా మాట్లాడిన ప్రధాని నరేంద్ర మోదీ.. ప్రతిపక్ష నేత ఆజాద్​.. దేశానికి చేసిన సేవను స్మరించుకుని భావోద్వేగానికి గురయ్యారు.

ఇదీ చూడండి:ఆ రెండు రోజులు లోక్​సభ పనికాలం 150శాతం!