గులాం నబీ ఆజాద్.. 'కాంగ్రెస్ అధ్యక్షుడు' గాంధీయేతరులే ఉండాలని ప్రతిపాదించిన హస్తం అసంతృప్త నేతల్లో ప్రధాన వ్యక్తి. ఫిబ్రవరి 15న ఆయన రాజ్యసభ పదవీకాలం ముగిసింది. అయితే.. ఇటీవల కశ్మీర్లో జరిగిన జీ-23 నేతల సమావేశంలో ప్రధాని నరేంద్ర మోదీని ప్రశంసించిన ఈ కాంగెస్ దిగ్గజ నేతను.. హస్తం పార్టీ మళ్లీ రాజ్యసభకు పంపించే సంకేతాలు కనిపిస్తున్నాయి.
మే నెలలో కాంగ్రెస్ అధ్యక్ష ఎన్నికలు నిర్వహించి హస్తం పీఠంపై మళ్లీ రాహుల్ను కూర్చోబెట్టాలని 'సోనియా పరివారమంతా' చూస్తోంది. ఈ నేపథ్యంలో.. రాహుల్ను అధ్యక్షుడు కాకుండా అడ్డంకులు సృష్టిస్తారనే భయంతోనే ఆజాద్ను రాజ్యసభకు పంపించాలని 'గాంధీ' కుటుంబం అనుకుంటోందా? తద్వారా జీ-23 నేతల డిమాండ్ను వ్యూహాత్మకంగా ఛేదించాలని భావిస్తోందా? అంటే అవుననే సమాధానాలే వస్తున్నాయి.
ఇదీ చూడండి:కాంగ్రెస్లో జీ23 గుబులు- చీలిక ఖాయమా?
ఇదంతా కేరళలోని మూడు రాజ్యసభ స్థానాలకు ఏప్రిల్ 12న ఎన్నికలు నిర్వహిస్తామని ఈసీ నుంచి నోటిఫికేషన్ వెలువడగానే ఊపందుకున్న వార్తలు. కేరళలో ఉన్న 3 రాజ్యసభ సీట్లలో రెండింటిని తన బలంతో రాష్ట్రంలో అధికారంలో ఉన్న వామపక్ష కూటమి గెలుచుకుంటుంది. అందులో ఎలాంటి సందేహం లేదు. మిగతా ఒక స్థానాన్ని కాంగ్రెస్ చేజిక్కించుకోవడం ఖాయం.
వారిని నిలువరించడానికేనా?
ఆ ఒక్క స్థానం నుంచి గులాం నబీ ఆజాద్కు మళ్లీ రాజ్యసభకు పంపించాలని కాంగ్రెస్ అధిష్ఠానం చూస్తోంది. అయితే ఇది కచ్చితంగా కాంగ్రెస్ అధ్యక్షునిగా రాహుల్ ఎన్నికకు జీ-23 నేతలు అడ్డొస్తారని, వారిని శాంతింపజేయడానికే 'గాంధీ పరివారం' పన్నిన వల అని అంటున్నారు కొందరు నేతలు. ఒకవేళ ఆయన్ను రాజ్యసభకు పంపించినా అక్కడ ప్రతిపక్షనేత హోదా ఆయనకు ఉండదు. ఎందుకంటే ఇప్పటికే ఆ స్థానంలో పార్టీ సీనియర్ నేత మల్లికార్జున ఖర్గే ఉన్నారు.
ఆజాద్ కాకపోతే ఇంకెవ్వరు?
ఒకవేళ ఆజాద్కు రాజ్యసభ సీటు ఇవ్వకపోతే తర్వాత ఆ స్థానానికి అర్హులు వయలార్ రవి. కేరళ తరఫున ఇప్పుడు రాజ్యసభకు ప్రాతినిధ్యం వహిస్తున్నారు. ఆయనను కాదని కాంగ్రెస్ అసంతృప్త జీ-23 నేతల్లో ప్రధాన వ్యక్తి అయిన గులాం నబీ ఆజాద్కు ఆ ఒక్క సీటు ఇచ్చే అవకాశం ఉందంటున్నారు కాంగ్రెస్ నేతలు. 'అలా జరిగే ప్రసక్తేలేదు.. రాష్ట్రంలోని నాయకత్వం దీన్ని తీవ్రంగా వ్యతిరేకిస్తుందని' కూడా కొందరు హస్తం నేతలు బల్లగుద్దుతున్నారు. కేసీ వేణుగోపాల్ను రాజస్థాన్ నుంచి రాజ్యసభకు పంపించినప్పుడు ఆ రాష్ట్ర కాంగ్రెస్ నాయకత్వం వ్యతిరేకించింది. ఇప్పుడు కేరళలో కూడా అదే పునరావృతం అవుతుందని అనేవారూ ఉన్నారు.
కాంగ్రెస్ నుంచి రాజ్యసభకు పంపించడానికి కేరళలో పార్టీ తరఫున సీనియర్ నేతలు ఎవరూ లేరు. మొన్నటివరకు కేరళలోని కాంగ్రెస్లో ఉన్న సీనియర్ నేత పీసీ చాకో.. హస్తం పార్టీని వీడి శరద్పవార్ ఎన్సీపీలో చేరారు. మిగతా కొందరు అసెంబ్లీ ఎన్నికల్లో బరిలోకి దిగుతున్నారు. దాంతో కేరళ పీసీసీ అధ్యక్షుడు ముల్లపల్లి రామచంద్రన్ ఒక్కరే చెప్పుకోదగ్గ సీనియర్ నేత. గతంలో ఆయన కేంద్ర మంత్రిగా పని చేశారు కాబట్టి.. రాజ్యసభకు పంపించేందుకు రామచంద్రన్నూ పరిగణనలోకి తీసుకొనే అవకాశాలున్నాయి.
ఇదీ చదవండి:బంగాల్ దంగల్: విజయానికి 'ఆమె' ఓట్లే కీలకం!
