విదేశాల సాయం వివరాలెక్కడ?: రాహుల్​

భారత్​కు విదేశాలు అందించిన సాయం వివరాల్లో పారదర్శకత లేదని కేంద్రాన్ని విమర్శించారు కాంగ్రెస్​ నేత రాహుల్ గాంధీ. ఈ విషయంపై కేంద్ర ప్రభుత్వానికి ట్విట్టర్ వేదికగా పలు ప్రశ్నలు సంధించారు.

కరోనా సంక్షోభ సమయంలో విదేశాలు భారత్​కు అందించిన సాయం వివరాలను కేంద్రం దాస్తోందని కాంగ్రెస్ నేత రాహుల్ గాంధీ ఆరోపించారు. ప్రపంచ దేశాలు భారత్​కు​ పంపిన వైద్య సామగ్రి వివరాల్లో పారదర్శకత ఎందుకు లేదని ధ్వజమెత్తారు. ఈ విషయంపై కేంద్రానికి ట్విట్టర్​ వేదికగా పలు ప్రశ్నలు సంధించారు.

రాహుల్ గాంధీ ట్వీట్​

1. ఇప్పటివరకు భారత్​కు విదేశాలు ఏమేం పంపాయి?
2. అవన్నీ ఎక్కడున్నాయి?
3. వాటి వల్ల ఎవరికి ప్రయోజనం చేకూరుతోంది?
4. రాష్ట్రాలకు వాటిని ఏ విధంగా కేటాయిస్తున్నారు?
5. పారదర్శకత ఎందుకు లేదు?

ఈ ప్రశ్నలన్నింటికీ కేంద్రం వద్ద సమాధానాలున్నాయా? అని రాహుల్ ట్వీట్​ చేశారు.

రాహుల్ గాంధీ ట్వీట్​

అంతకుముందు దేశంలో నిరుద్యోగ రేటు గురించి సెంటర్​ ఫర్ మానిటరింగ్​ ఇండియన్​ ఎకానమీ(సీఎంఐఈ) డేటాను ఆధారంగా చూపుతూ భాజపా ప్రభుత్వంపై విమర్శలు గుప్పించారు రాహుల్​. కరోనాపై పోరులో కేంద్రం విఫలమైందని దుయ్యబట్టారు.

" దేశంలో వ్యాక్సిన్లు లేవు, ఉపాధి లేదు. కరోనా కారణంగా ప్రజలు తీవ్ర ఇబ్బందులు ఎదుర్కొంటున్నారు. మోదీ ప్రభుత్వం పూర్తిగా విఫలమైంది" అని హిందీలో ట్వీట్​ చేశారు.

ఇదీ చూడండి:కరోనా వార్డుకు నో- నారింజ​ తోటలోనే చికిత్సకు మొగ్గు!