WHO on booster dose: ప్రస్తుతం అందుబాటులో ఉన్న కరోనా వ్యాక్సిన్లకు మరిన్ని మార్పులు చేయాల్సిన అవసరం ఉందని ప్రపంచ ఆరోగ్య సంస్థ(WHO) అభిప్రాయపడింది. ఇవి కరోనా వైరస్నుంచి రక్షణ కల్పించి, తీవ్ర అనారోగ్యానికి గురికాకుండా కాపాడుతున్నప్పటికీ.. భవిష్యత్తులో రాబోయే కొత్త వేరియంట్లను ఏ మేరకు నిలువరిస్తాయో తెలియదని పేర్కొంది. అందుకే ఏ వేరియంట్ వచ్చినా ప్రభావవంతంగా పనిచేసేలా వ్యాక్సిన్లకు మార్పులు చేయడమో, కొత్త టీకాలను అభివృద్ధి చేయడమో జరగాల్సిన అవసరం ఉందని చెప్పింది. ఈ మేరకు WHO సాంకేతిక సలహా సంఘం మంగళారం ఓ ప్రకటనలో పేర్కొంది. ఇందులో 18మంది నిపుణులు ఉన్నారు.
ప్రస్తుతం మనకు అందుబాటులో ఉన్న వ్యాక్సిన్లు ఉన్నత స్థాయిలో రక్షణ కల్పిస్తున్నాయి. ఆందోళనకర వేరియంట్ల నుంచి కూడా మరణం ముప్పు లేకుండా కాపాడుతున్నాయి. అయితే తరచూ బూస్టర్ డోసులు తీసుకోవాలనే వ్యాక్సినేషన్ వ్యూహం సరైనది, స్థిరమైనది కాదు. ప్రపంచమంతా ఉద్ధృతంగా వ్యాపిస్తున్న ఒమిక్రాన్ బారినపడిన వారిలో వ్యాధి లక్షణాలు లేకుండా టీకాలు నిలువరించలేకపోతున్నాయి. అందుకే వీటిని అప్డేట్ చేయాల్సిన అవసరం ఉంది. ఏ వేరియంట్ వచ్చినా ప్రభావం చూపే విధంగా టీకాలను అభివృద్ది చేయాలి. దీర్ఘకాలిక రక్షణ కల్పించేలా అవి ఉండాలి.