Mamata banerjee: 'సీఎస్​ను రిలీవ్ చేసేది లేదు'

బంగాల్ సీఎస్​ను దిల్లీకి డిప్యుటేషన్​ మీద పంపించేది లేదని ఆ రాష్ట్ర సీఎం మమతా బెనర్జీ(Mamata banerjee) తేల్చి చెప్పారు. ఆయన పదవీ కాలం మూడు నెలల పాటు కొనసాగిస్తూ కేంద్రం ఇదివరకు ఇచ్చిన ఆదేశాలే కొనసాగుతాయని స్పష్టం చేశారు. ఈ మేరకు ప్రధాని మోదీకి లేఖ రాశారు.

బంగాల్ ముఖ్య కార్యదర్శి ఆలాపన్ బంధోపాధ్యాయ్ డిప్యుటేషన్​పై ప్రధాని మోదీకి బంగాల్ సీఎం మమతా బెనర్జీ(Mamata banerjee) లేఖ రాశారు. సీఎస్​ను రిలీవ్ చేయలేమని ప్రధానికి స్పష్టం చేశారు. ప్రస్తుతమున్న క్లిష్ట పరిస్థితుల్లో ఆయన్ను వదులుకోలేమని అన్నారు. ఈ నేపథ్యంలో దిల్లీకి వచ్చి రిపోర్టు చేయాలని కేంద్రం పంపిన ఉత్తర్వులను ఉపసంహరించుకోవాలని కోరారు.

"సీఎస్​ను రీకాల్ చేస్తూ ఇచ్చిన ఏకపక్ష ఆదేశాలను చూసి షాక్​కు గురయ్యా. ఈ క్లిష్ట సమయంలో బంగాల్ ప్రభుత్వం తన సీఎస్​ను వదులుకోదు, వదలబోదు. రాష్ట్ర ప్రభుత్వాన్ని సంప్రదించి సీఎస్ పదవీకాలాన్ని మూడు నెలల పాటు కొనసాగిస్తూ కేంద్రం జారీ చేసిన ఆదేశాలే కొనసాగుతాయని భావించండి."

-మమతా బెనర్జీ, బంగాల్ సీఎం

ప్రస్తుతం బంగాల్ సీఎస్​గా ఉన్న ఆలాపన్​కు మే 31తో 60 ఏళ్లు నిండుతాయి. ఇదే రోజు ఆయన పదవీవిరమణ చేయాల్సి ఉంది. అయితే ఆయన పదవీ కాలాన్ని మరో మూడు నెలల పాటు పొడిగించాలని ముఖ్యమంత్రి మమతా బెనర్జీ(Mamata banerjee) .. కేంద్ర ప్రభుత్వాన్ని మే 17న అభ్యర్థించారు. కొవిడ్​పై పోరులో ఆయన సేవలు అవసరమవుతాయని పేర్కొన్నారు.

దీనికి మే 25న సానుకూలంగా స్పందించిన కేంద్రం.. ఆయన పదవి కొనసాగింపునకు అనుమతించింది. ఇది జరిగి మూడు రోజులు కాకముందే ఈ ఆదేశాలను వెనక్కి తీసుకుంది. సీఎస్‌ బంధోపాధ్యాయ్‌ సేవలను ఉపయోగించుకోదలచినట్టు సమాచారం పంపించింది. తక్షణమే ఆయనను రిలీవ్‌ చేయాలని రాష్ట్ర ప్రభుత్వాన్ని ఆదేశించింది.

ఇదీ చదవండి-