భవానీపుర్​ స్థానానికి బంగాల్​ సీఎం నామినేషన్

బంగాల్​లో భవానీపుర్​ అసెంబ్లీ స్థానానికి నామినేషన్​ వేశారు ముఖ్యమంత్రి మమతా బెనర్జీ. ఈ నెల 30న పోలింగ్​ జరగనుంది. సీఎంగా కొనసాగాలంటే ఈ పోరులో మమత గెలవడం తప్పనిసరి. అక్టోబర్​ 3న ఫలితం ప్రకటించనున్నారు.

బంగాల్‌ ముఖ్యమంత్రి, తృణమూల్‌ కాంగ్రెస్‌(టీఎంసీ) అధినేత్రి మమతా బెనర్జీ.. భవానీపుర్‌ శాసనసభ స్థానానికి నామినేషన్‌ వేశారు. కోల్​కతాలోని సర్వే బిల్డింగ్​కు చేరుకున్న మమత.. నామపత్రాల సమర్పణ ప్రక్రియ పూర్తిచేశారు.

నామినేషన్​ వేసేందుకు వచ్చిన మమత

నామినేషన్​ వేస్తున్న మమతా బెనర్జీ

ఏప్రిల్​లో జరిగిన అసెంబ్లీ ఎన్నికల్లో నందిగ్రామ్​ నుంచి పోటీచేసిన మమత అప్పుడు ఓడిపోయారు. అయినా సీఎంగా బాధ్యతలు స్వీకరించిన దీదీ.. ఆరు నెలల్లో ఎమ్మెల్యేగా ఎన్నిక కావాల్సిన పరిస్థితి ఏర్పడింది.

సర్వే బిల్డింగ్​ ముందు అభివాదం చేస్తున్న దీదీ

ఈ నేపథ్యంలో భవానీపుర్​ నుంచి ఎన్నికైన సోబన్​దేవ్​ ఛటోపాధ్యాయ రాజీనామా చేయగా.. ఉపఎన్నిక నిర్వహిస్తోంది ఎన్నికల సంఘం. ఈ నెల 30న పోలింగ్​ జరగనుంది. అక్టోబర్​ 3న ఓట్ల లెక్కింపు చేపట్టనున్నారు.

మమతా బెనర్జీపై.. భాజపా తరఫున న్యాయవాది ప్రియాంక తిబ్రీవాల్ పోటీపడనున్నారు. కాంగ్రెస్​.. పోటీకి దూరంగా ఉండనున్నట్లు ప్రకటించింది.

మమత ఓడినా.. తృణమూల్​ జయభేరి

ఇటీవల జరిగిన అసెంబ్లీ ఎన్నికల్లో మొత్తం 294 స్థానాలకు.. టీఎంసీ 213 కైవసం చేసుకుంది. భాజపా 77 చోట్ల గెలిచి ప్రధాన ప్రతిపక్షంగా అవతరించింది. మమతా బెనర్జీ.. నందిగ్రామ్​ నియోజకర్గం నుంచి పోటీ చేసి భాజపా అభ్యర్థి సువేందు అధికారి చేతిలో స్వల్ప తేడాతో ఓడిపోయారు.

ఇదీ చూడండి: దీదీపై పోటీకి భాజపా సై..