మద్యం షాపులకు అనుమతి.. ఆ జంట ఏం చేసిందంటే!

కేరళలో మద్యం దుకాణాలు తెరవటంపై వినూత్నంగా నిరసన తెలిపారు ఆల్ కేరళ కేటరర్స్ అసోసియేషన్ సభ్యులు. కోజికోడ్​లో ఓ మద్యం దుకాణం ముందు వివాహం జరిపించారు. ఏకంగా కోజికోడ్​ నియోజకవర్గ ఎంపీనే పురోహితుడిగా మారి పెళ్లి చేశారు. ఈ దృశ్యాలు సామాజిక మాధ్యమాల్లో వైరల్​గా మారాయి.

సాధారణంగా వివాహాలు పెళ్లి మండపాలు, రిజిస్ట్రార్​ ఆఫీస్​లోనో జరుగుతాయి. డెస్టినేషన్​ మ్యారేజెస్​ గురించీ విన్నాం. సముద్ర గర్భంలో పెళ్లి చేసుకోవడాన్నీ చూశాం. కానీ ఓ జంట మాత్రం.. మద్యం షాపు ముందు పెళ్లి చేసుకొని అందరినీ ఆశ్చర్యపరిచింది. ఈ వివాహానికి ఓ ఎంపీ పురోహితుడిగా మారటం మరింత ప్రాధాన్యం సంతరించుకుంది.

మద్యం దుకాణం ముందే పెళ్లి వేడుక

ఫ్లకార్డులతో నిరసన

కేరళలో ఇతర కార్యకలాపాలపై ఆంక్షలు విధించి మద్యం దుకాణాలు మాత్రం పూర్తిస్థాయిలో అనుమతించడంపై ఆల్​ కేరళ కేటరర్స్ అసోసియేషన్ సభ్యులు ఆందోళన చేపట్టారు. నిరసనల్లో భాగంగా కోజికోడ్​లోని సరోవరమ్​ లిక్కర్ షాపు ముందు వివాహం నిర్వహించారు. కోజికోడ్ ఎంపీ ఎంకే రాఘవన్​ పురోహితుడిగా మారి ఈ వివాహం జరిపించడం విశేషం.

నో పర్మిషన్​..

మద్యం దుకాణాలకు అనుమతులు ఇచ్చిన ప్రభుత్వం.. కేటరింగ్​ సేవలకు మాత్రం పర్మిషన్​ ఇవ్వటం లేదని కేటరర్స్ అసోసియేషన్ సభ్యులు ఆవేదన వ్యక్తం చేశారు. కేటరింగ్ రంగంపై అనేక మంది ఆధారపడుతున్నారని.. ప్రభుత్వం నిర్లక్ష్యంగా వ్యవహరించటం వల్ల అనేక మంది జీవనోపాధి దెబ్బతింటోందన్నారు.

అక్కడే ఎందుకు?

వైన్ షాప్​ ముందు వివాహం చేసుకున్న జంట

మద్యం షాప్​ ముందు ఒక్కటైన జంట

"రాష్ట్రంలోని మద్యం దుకాణాల ముందు ప్రజలు భారీ ఎత్తున గుమికూడుతున్నారు. కరోనా నిబంధనలు పాటించటం లేదు. పోలీసులు పట్టించుకోవటం లేదు. మరి ఇక్కడైతేనే వివాహం వైభవంగా చేసుకోవచ్చని, ఇక్కడ ఏ నిబంధనలు వర్తించవని" ఆల్​ కేరళ కేటరర్స్ అసోసియేషన్ సభ్యులు తెలిపారు.

రామనత్తుకరాకు చెందిన ప్రమోద్, పంతీరంకవు గ్రామానికి చెందిన ధాన్యల వివాహం చేశారు.

ఇదీ చదవండి :వేప పండ్లతో అక్కడి వారికి డబ్బులే డబ్బులు!