ఆ విషయం చైనాకు మేం ఎన్నోసార్లు చెప్పాం

ద్వైపాక్షిక సంబంధాల్లో.. 'సరిహద్దులో ప్రశాంతత' కీలక పాత్ర పోషిస్తుందని చైనాకు భారత్​ అనేకసార్లు చెప్పిందని తెలిపారు కేంద్ర విదేశాంగ కార్యదర్శి హర్షవర్ధన్​ శృంగ్లా. డ్రాగన్​తో భారత్​కు అతిపెద్ద వాణిజ్య అనుబంధం ఉందని పేర్కొన్నారు.

సరిహద్దులో ప్రశాంతతపై ఆధారపడే ద్వైపాక్షిక సంబంధాలు కొనసాగుతాయని చైనా ప్రతినిధులతో తాము ఎన్నోసార్లు చెప్పామని విదేశాంగ కార్యదర్శి హర్షవర్ధన్ శృంగ్లా తెలిపారు. ప్రపంచంలో రెండో అతిపెద్ద ఆర్థిక వ్యవస్థ అయిన చైనాకు భారత్​తో అతిపెద్ద వాణిజ్య అనుబంధం ఉందని అన్నారు.

డ్రాగన్​తో ఆర్థిక సంబంధాలను భారత్​ కొనసాగించాల్సిన అవసరం ఉందని, అయితే.. అది ఇరుదేశాల మధ్య రాజకీయపరమైన ముఖ్య సమస్యలను పరిష్కరించే క్రమంపై ఆధారపడి ఉంటుందని పేర్కొన్నారు. ఆసియా(ఎకానమికల్​ డైలాగ్​) ఆర్థిక సదస్సులో ఆయన ఆదివారం వర్చువల్​గా పాల్గొన్నారు. భారత్​-చైనా సరిహద్దులో ఇటీవలి ప్రతిష్టంభనపై మాట్లాడారు.

సరిహద్దులో ప్రశాంతగా ఉంటేనే.. ద్వైపాక్షిక సంబంధాలు బలంగా ఉంటాయని చైనా ప్రతినిధులతో మేం ఎన్నోసార్లు చెప్పాం. బలగాల ఉపసంహరణతో.. సమస్యల పరిష్కారంలో కాస్త పురోగతి కనిపిస్తోంది. చైనాతో భారత్​కు అతిపెద్ద సరిహద్దు ఉంది. మనం ఓ చిన్న ప్రాంతం గురించే మాట్లాడుతున్నాం. లద్దాఖ్​ సెక్టార్​లోని ఇతర సమస్యలను పరిష్కరించేందుకు కూడా మేం ప్రయత్నిస్తున్నాం.

-హర్షవర్ధన్​ శృంగ్లా, భారత విదేశాంగ కార్యదర్శి

భారత్​-చైనా సరిహద్దులోని సమస్యలను పరిష్కరించేందుకు ప్రయత్నాలు జరుగుతున్నాయని శృంగ్లా తెలిపారు. ఇరు దేశాల ఆర్థిక సంబంధాలపై ఈ చర్య ప్రభావం చూపిందని పేర్కొన్నారు.

ఇదీ చదవండి:దేశీయ నిఘా వ్యవస్థకు 'సింధు నేత్ర'