'ఆహారం వృథా చేయటం అంటే పేదలను దోచుకోవటమే'

ఆహారాన్ని వృథా చేయడం అంటే.. పేద ప్రజలను దోచుకోవడంతో సమానమని కాంగ్రెస్ అగ్రనేత రాహుల్​ గాంధీ వ్యాఖ్యానించారు. దేశంలో గత మూడేళ్ల కాలంలో రూ.406 కోట్ల ఆహార ధాన్యాలు వృథా అయ్యాయని చెప్పారు.

ఆహార ధాన్యాల నిర్వహణలో ప్రభుత్వ తీరును తీవ్రంగా విమర్శించారు కాంగ్రెస్ అగ్రనేత రాహుల్ గాంధీ. ఆహారాన్ని వృథా చేయడమంటే పేద ప్రజలను దోచుకోవడమేనని వ్యాఖ్యానించారు. ఈ మేరకు ఇన్​స్టాగ్రామ్​ వేదికగా ఆయన ఓ పోస్ట్​ చేశారు. రాహుల్​ తన పోస్ట్​కు గత మూడేళ్ల కాలంలో దేశంలో రూ.406 కోట్ల విలువైన ఆహార ధాన్యాలు వృథా అయ్యాయని చెప్పే ఓ పత్రికా కథనాన్ని జోడించారు.

రాష్ట్రాల్లోని ధాన్యాగారాల్లో భద్రతా లోపాల వల్ల రూ.406 కోట్ల ఆహార ధాన్యాలు పాడయ్యాయని రాహుల్​ షేర్ చేసిన పత్రికా కథనం చెబుతోంది. ఈ విషయాన్ని పార్లమెంటరీ స్టాండింగ్​ కమిటీ తన నివేదికలో చెప్పినట్లుగా సదరు పత్రికా కథనం పేర్కొంది. "ఆహారాన్ని వృథా చేయడం అంటే.. పేదలను దోచుకోవడం రెండూ ఒకటే." అంటూ రాహుల్..​ తన పోస్టుకు #GOIwastes అనే హ్యాష్​ట్యాగ్​ను జత చేశారు.

ఆహార ధాన్యాలు వృథా కాకుండా ప్రభుత్వాలు చర్యలు తీసుకోవాలని పార్లమెంటరీ స్టాండింగ్​ కమిటీ తన నివేదికలో తెలిపింది. వాటిని భద్రపరిచేందుకు తగిన శాస్త్రీయ పద్ధతులు అలవంబించాలని చెప్పింది. ఒకవేళ పాడైపోతే సంబంధిత అధికారులను బాధ్యులుగా పరిగణించాలని పేర్కొంది.

ఇదీ చూడండి:ఉపరాష్ట్రపతిగా వెంకయ్య నాలుగేళ్ల స్ఫూర్తి ప్రయాణం

ఇదీ చూడండి:గురువారం మహిళల ఖాతాల్లో రూ.1,625 కోట్లు జమ!