virtual elections: రానున్న అసెంబ్లీ ఎన్నికల్లో వర్చువల్ ర్యాలీలు, ఆన్లైన్ ఓటింగ్ సాధ్యమేనా అని భారత ఎన్నికల సంఘాన్ని ప్రశ్నించింది ఉత్తరాఖండ్ హైకోర్టు. ర్యాలీలతో పాటు ఆన్లైన్ విధానంలో ఓటింగ్ సౌకర్యాలు కల్పించే అంశాల సాధ్యాసాధ్యాలపై పరిశీలించాలని సూచించింది.
కొవిడ్-19 మహమ్మారి విజృంభిస్తున్న నేపథ్యంలో రానున్న ఉత్తరాఖండ్ అసెంబ్లీ ఎన్నికలను వాయిదా వేయాలని దాఖలైన ప్రజాప్రయోజన వ్యాజ్యంపై విచారణ చేపట్టింది హైకోర్టు తాత్కాలిక సీజే జస్టిస్ సంజయ్ కుమార్ మిశ్ర, జస్టిస్ ఎన్ఎస్ ధనిక్ ధర్మాసనం. ఆన్లైన్ ఓటింగ్ విధానంపై ఈసీని ప్రశ్నించింది.
ఎన్నికల ర్యాలీలకు ప్రత్యామ్నాయ మార్గాలు కనుక్కోవటం లేదా నిషేధించే అంశం కోర్టులో పెండింగ్లో ఉన్న సమయంలో రాష్ట్రంలో ర్యాలీలు చేపడుతున్నారని పిల్లో పేర్కొన్నారు పిటిషనర్. దెహ్రాదూన్లో ప్రచారం సందర్భంగా దిల్లీ ముఖ్యమంత్రి అరవింద్ కేజ్రీవాల్ కరోనా బారినపడ్డారని కోర్టుకు సూచించారు పిటిషనర్ తరఫు న్యాయవాది శివ భట్. ఎన్నికల ర్యాలీలు ప్రమాదకరంగా మారుతాయని, భారీ సంఖ్యలో ప్రజలు గుమిగూడటం వల్ల ఒమిక్రాన్ మరింత వేగంగా విస్తరించే అవకాశం ఉందని తెలిపారు.