ఛత్తీస్‌గఢ్‌లోని సుక్మా జిల్లాలో సాయుధులైన మావోయిస్టులు ఓ గ్రామంపై దాడి చేశారు. స్థానికుడైన డర్రే నవీన్ అనే వ్యక్తిని హతమార్చారు. అనంతరం మృతదేహాన్ని రోడ్డు పక్కన పడేసి వెళ్లారు. ఈ ఘటనలో మరో వ్యక్తి తీవ్రంగా గాయపడినట్లు పోలీసులు తెలిపారు.
గ్రామస్థుడి ఇంటికి చేరుకున్న నక్సలైట్లు.. అతడిని ఎత్తుకెళ్లి కొంతదూరంలో గొడ్డలితో నరికి చంపారని పోలీసులు వెల్లడించారు. మృతదేహం వద్ద ఓ కరపత్రాన్ని వదిలి కూడా వెళ్లారు. 'నవీన్ అక్రమంగా అడవులను నరికి, భూమిని ఆక్రమించుకుంటున్నాడు' అని అందులో ఆరోపించారు. అంతేగాక మరో 10 మందికి పైగా గ్రామస్థుల పేర్లను ప్రస్తావించి.. 'వారిని కూడా ఇదేవిధంగా చంపుతాం' అని హెచ్చరించారు. సమాచారం అందుకున్న ఎర్రబోరు పోలీసులు సంఘటనా స్థలానికి చేరుకున్నారు. నవీన్ మృతదేహాన్ని పోస్టుమార్టం నిమిత్తం తరలించారు.