ఆప్ కన్వీనర్‌, ముఖ్యమంత్రి కేజ్రీవాల్‌ నేతృత్వంలోని దిల్లీ ప్రభుత్వంపై మరో వివాదం ముసురుకుంది. ఆ ప్రభుత్వం చేపట్టిన పాఠశాల తరగతి గదుల నిర్మాణంలో రూ.1300 కోట్ల కుంభకోణం జరిగిందని, ఈ అక్రమాలపై ప్రత్యేక సంస్థతో దర్యాప్తు జరిపించాలని విజిలెన్స్‌ డైరెక్టరేట్‌ సిఫార్సు చేసింది. రాష్ట్ర ప్రభుత్వ ప్రధాన కార్యదర్శికి అందజేసిన నివేదికలో ఈ విషయాలున్నాయని అధికార వర్గాలు వెల్లడించాయి. దీనిపై వెంటనే స్పందించిన భాజపా నేతలు.. విద్యాశాఖ మంత్రి మనీశ్‌ సిసోదియాను పదవి నుంచి తొలగించాలని, లేదంటే ముఖ్యమంత్రి కేజ్రీవాల్‌ రాజీనామా చేయాలని డిమాండ్‌ చేశారు.
సెంట్రల్‌ విజిలెన్స్‌ కమిషన్‌(సీవీసీ) 2020 ఫిబ్రవరి 17వ తేదీతో రూపొందించిన నివేదికలో.. దిల్లీ ప్రభుత్వం చేపట్టిన 2400 తరగతి గదుల నిర్మాణంలో భారీ అక్రమాలు జరిగాయని పేర్కొంది. ప్రజా పనుల విభాగం (పీడబ్ల్యూడీ) పర్యవేక్షణలో ఈ పనులు జరిగాయి. అదే నెలలో ఈ నివేదికను దిల్లీ ప్రభుత్వానికి చెందిన విజిలెన్స్‌ డైరెక్టరేట్‌కు పంపించి, దాని అభిప్రాయం తెలపాలని కోరింది. అయితే, దిల్లీ లెఫ్టినెంట్‌ గవర్నర్‌ వి.కె.సక్సేనా అడిగే వరకు కూడా విజిలెన్స్‌ డైరెక్టరేట్‌ రెండున్నరేళ్ల పాటు ఆ నివేదిక గురించి నోరు మెదపలేదు. ఈ జాప్యానికి కారణమేమిటో దర్యాప్తు చేయాలని ఈ ఏడాది ఆగస్టులో ప్రభుత్వ ప్రధాన కార్యదర్శిని గవర్నర్‌ ఆదేశించారని అధికార వర్గాలు తెలిపాయి. రూ.1300 కోట్ల కుంభకోణంలో విద్య, ప్రజా పనుల విభాగాల అధికారుల ప్రమేయం ఉందని, అక్రమాలకు వారిని బాధ్యులను చేయాలని విజిలెన్స్‌ డైరెక్టరేట్‌ సిఫార్సు చేసినట్లు సమాచారం.