'భారత్​లో డిసెంబర్​ నాటికి వ్యాక్సినేషన్​ పూర్తి'

దేశంలో 2021 డిసెంబర్​ నాటికి వ్యాక్సినేషన్​ పూర్తవుతుందని తెలిపారు కేంద్ర మంత్రి ప్రకాశ్​ జావడేకర్​. మొత్తం 216 కోట్ల డోసులు అందుబాటులోకి వస్తాయని తెలిపారు. రాహుల్​ గాంధీపై తీవ్ర విమర్శలు చేశారు. ఆయన మాటలు, ప్రజల్లో భయం సృష్టించేందుకు చేస్తున్న ప్రయత్నం టూల్​కిట్​లో భాగమేనని ఆరోపించారు.

దేశంలో వ్యాక్సినేషన్​ ప్రక్రియ వేగంగా జరుగుతోందన్నారు కేంద్ర మంత్రి ప్రకాశ్​ జావడేకర్​. 2021 డిసెంబర్​ కన్నా ముందే టీకా పంపిణీ (Vaccination) పూర్తవుతుందని తెలిపారు.

"వ్యాక్సిన్​ (corona vaccine) గురించి ఎలాంటి వివాదం లేదు. డిసెంబర్​ నాటికి 216 కోట్ల టీకా డోసులు అందుబాటులోకి వస్తాయి. 108 కోట్ల మందికి ఎలా టీకా అందించాలనే ప్రణాళిక పూర్తయింది. కొవిషీల్డ్​, కొవాగ్జిన్(Covaxin)​, జైడస్​ క్యాడిలా, నొవావాక్​, జినోవా, స్పుత్నిక్​ వంటి స్వదేశీ, విదేశీ టీకాలు అందుబాటులోకి వస్తున్నాయి. ఏ విధంగా వస్తాయి అనేది పూర్తిగా ఇందులో ఉంది. అవి మొత్తం 216 కోట్ల డోసులు రాహుల్​ జీ. 2021, డిసెంబర్​ కన్నా ముందే భారత్​లో వ్యాక్సినేషన్​ పూర్తవుతుందని స్పష్టంగా తెలుస్తోంది. "

- ప్రకాశ్​ జావడేకర్​, కేంద్ర మంత్రి

వ్యాక్సినేషన్​ గురించి ప్రధాని మోదీపై విమర్శలు చేస్తున్న కాంగ్రెస్ నేత రాహుల్​ గాంధీ తీరును తప్పుపట్టింది భాజపా. ఆయన మాట్లాడుతున్న శైలి, భయాలను ప్రేరేపించేందుకు చేస్తున్న ప్రయత్నం.. టూల్​కిట్​ వెనకాల ఆయన పార్టీ ఉన్నట్లు ధ్రువీకరిస్తోందని పేర్కొంది. కొవిడ్​ కట్టడికి మోదీ కృషి చేస్తున్న తరుణంలో ఆయన జిమ్మిక్​ చేస్తున్నారని వ్యాఖ్యానించటం టూల్​కిట్​ స్క్రిప్ట్​లో ఒక భాగమేనని కేంద్ర మంత్రి ప్రకాశ్​ జావడేకర్​ పేర్కొన్నారు. దేశ ప్రజలను గాంధీ అవమానిస్తున్నారని ఆరోపించారు. ఇప్పటికే 20 కోట్ల డోసుల పంపిణీతో ప్రపంచంలోనే రెండో స్థానంలో భారత్​ నిలిచిందన్నారు. ఆగస్టు నుంచి పెద్ద ఎత్తున వ్యాక్సినేషన్​ చేపట్టేందుకు ప్రణాళికలు సిద్ధమైనట్లు తెలిపారు. కాంగ్రెస్​ పాలిత రాష్ట్రాలు వారికి కేటాయించి కోటాను సైతం ఉత్పత్తిదారుల నుంచి తీసుకోకపోవటంపై దృష్టి సారించాలని ఎద్దేవా చేశారు.

కొవిడ్​ రెండో దశకు మోదీదే బాధ్యత: రాహుల్​

అంతకుముందు... కొవిడ్​ కట్టడిలో ప్రభుత్వం విఫలమైందని కాంగ్రెస్​ అగ్రనేత రాహుల్​ గాంధీ(Rahul Gandhi) ఆరోపించారు. రెండో దశ ఉద్ధృతికి ప్రధాని మోదీదే బాధ్యతగా పేర్కొన్నారు. ప్రస్తుతం నడుస్తున్న టీకా పంపిణీ తీరుతో మరిన్ని దశలు వస్తాయని హెచ్చరించారు. దేశ ప్రజలందరికీ టీకా ఇచ్చే వ్యూహాన్ని వెల్లడించాలని కోరారు. ప్రపంచానికే వ్యాక్సిన్​ హబ్​గా ఉన్న భారత్​లో వ్యాక్సినేషన్​ను వేగవంతం చేయటం సులభమేనన్నారు.

" ప్రస్తుతం 3 శాతం మందికే టీకా అందాయి. ఇలాగే కొనసాగితే మూడో దశ(Third Wave) ఉద్ధృతి తప్పదు. అయితే.. 50-60 శాతం మందికి వ్యాక్సిన్​ అందితే భారత్​లో మూడో దశ, ఆ తర్వాత 4, 5 దశలు ఉండవు. సరైన వ్యూహం లేనందునే సమస్య తలెత్తుతోంది. ప్రధాని వ్యూహాత్మకంగా ఆలోచించటం లేదు. ఆయన ఒక ఈవెంట్​ మేనేజర్. ఒకసారి ఒక్క ఈవెంట్​ గురించే ఆలోచిస్తున్నారు. అలాంటి ఈవెంట్లు అవసరం లేదు. అవి ప్రజలను చంపుతాయి. మీకు వ్యూహం అవసరం. కరోనాకు తావులేకుండా చేసే వ్యూహం కావాలి."

- రాహుల్​ గాంధీ, కాంగ్రెస్​ అగ్రనేత.

ఇదీ చూడండి:కరోనా సాయంపై రాష్ట్రాలకు సుప్రీం కీలక ఆదేశాలు