'సొరంగంలోని కూలీల ప్రాణాలకు ముప్పు- రెస్క్యూ ఆపరేషన్​ వేగవంతం చేయాల్సిందే!'

Uttarakhand Tunnel Collapse Rescue : ఉత్తరాఖండ్​లోని చార్​ధామ్​ సొరంగం లోపల చిక్కుకున్న వారిని కాపాడేందుకు జరుగుతున్న రెస్క్యూ ఆపరేషన్​ను మరింత వేగవంతం చేయాలని డిమాండ్లు వస్తున్నాయి. శిథిలాల కింద ఉన్న కార్మికుల ప్రాణాలకు ముప్పు పొంచి ఉందని వారి కుటుంబ సభ్యులు, తోటి కార్మికులు ఆందోళన వ్యక్తం చేస్తున్నారు.

Uttarakhand Tunnel Collapse Rescue :ఉత్తరాఖండ్‌లో చార్​ధామ్ సొరంగంలోని శిథిలాల కింద చిక్కుకున్న 40 మంది కార్మికులను రక్షించేందుకు ఐదో రోజు రెస్క్యూ ఆపరేషన్ యుద్ధప్రాతిపదికన కొనసాగుతోంది. సహాయక బృందాలు శిథిలాల కింద చిక్కుకున్న వారిని సురక్షితంగా బయటకు తీసుకొచ్చేందుకు అనేక గంటలుగా శ్రమిస్తున్నారు. టన్నెల్​లో చిక్కుకున్నవారిని సురక్షితంగా బయటకు తీసుకువస్తామని అధికారులు చెబుతున్నారు.

"మాకు ప్రభుత్వపరంగా పూర్తి మద్ధతు లభిస్తోంది. భారీ డ్రిల్లింగ్​ యంత్రాలను అమర్చి ఈ రెస్క్యూ ఆపరేషన్​ను 99.99% విజయవంతంగా పూర్తిచేస్తామనే నమ్మకముంది. ఈ విషయాన్ని తప్పుదోవ పట్టించొద్దని అందరినీ కోరుతున్నాను. టన్నెల్​లో శిథిలాల కింద ఉన్నవారందరూ సురక్షితంగానే ఉన్నారు. వారికి ఎటువంటి వైద్య సహాయం అవసరం లేదు. అయినప్పటికీ వైద్యబృందాన్ని అందుబాటులో ఉంచాం.

- గిర్దారిలాల్​, ఎన్​హెచ్​ఐడీసీఎల్ పీఆర్వో

దిల్లీ నుంచి భారీ డ్రిల్లింగ్​ యంత్రాలు..
రెస్క్యూ ఆపరేషన్​లో భాగంగా దిల్లీ నుంచి విమానంలో భారీ డ్రిల్లింగ్ యంత్రాలు తీసుకువచ్చామని ఎన్​హెచ్​ఐడీసీఎల్ అధికారి తెలిపారు. డ్రిల్లింగ్ మిషన్ల ద్వారా సహాయక చర్యలు కొనసాగుతున్నాయని ఆయన వెల్లడించారు. మరోవైపు సొరంగంలో చిక్కుకున్నవారిని రక్షించేందుకు కొనసాగుతున్న సహాయక చర్యలపై ఉత్తరాఖండ్ ముఖ్యమంత్రి పుష్కర్​ సింగ్ ధామీ.. అధికారులతో సమీక్షించారు.

రెస్క్యూ ఆపరేషన్ వేగవంతం చేయాలని డిమాండ్
రెస్క్యూ ఆపరేషన్​ను మరింత వేగవంతం చేయాలని సొరంగంలో చిక్కుకున్న వారి కుటుంబ సభ్యులు, తోటి కార్మికులు డిమాండ్ చేశారు. తమ సహాద్యోగుల ప్రాణాలకు ముప్పు పొంచి ఉందని ఆందోళన వ్యక్తం చేశారు. రెస్య్యూ ఆపరేషన్​ను త్వరగా పూర్తిచేసి తమ తోటి ఉద్యోగులను కాపాడాలని కోరుతూ కార్మికులు నిరసన వ్యక్తం చేశారు.

"నా కుమారుడు విజయకుమార్(20) టన్నెల్​లో చిక్కుకున్నడు. తనతో మాట్లాడి ధైర్యంగా ఉండాలని సూచించాను. ఈ రోజు సాయంత్రంలోగా అధికారులు బయటకు తీసుకువస్తారని హామీ ఇచ్చాను. చాలా తక్కువగా ఆహారం, నీరు సరఫరా చేస్తున్నారు"

-- ధరమ్ సింగ్​, బాధితుడి తండ్రి

ఏం జరిగిందంటే?
ఆదివారం తెల్లవారుజామున.. ఉత్తరాఖండ్‌లో నిర్మాణంలో ఉన్న సొరంగం కూలిపోయింది. ఉత్తరకాశి జిల్లాలోని బ్రహ్మకల్‌-యమునోత్రి జాతీయ రహదారిపై సిల్క్‌యారా, దండలగావ్ మధ్య నిర్మిస్తున్న ఈ టన్నెల్‌లో కొంతమేర కూలిపోయింది. ఘటన జరిగిన సమయంలో లోపల 40 మంది కూలీలు చిక్కుకున్నట్లు వెల్లడించారు అధికారులు. నాలుగున్నర కిలోమీటర్ల పొడవైన ఈ సొరంగంలో.. 150 మీటర్ల పొడవున కూలినట్లు వివరించారు. చార్‌ధామ్‌ ప్రాజెక్టులో భాగంగా ఈ సొరంగం నిర్మాణం జరుగుతోంది.