'ఉత్తరాఖండ్'​కు మోదీ, షా భరోసా

ఉత్తరాఖండ్​ చమోలీ జిల్లాలో జరిగిన విపత్తుపై ప్రధానమంత్రి నరేంద్ర మోదీ, కేంద్ర హోంమంత్రి అమిత్​ షా సమీక్షించారు. ముఖ్యమంత్రి టీఎస్​ రావత్, ఇతర ఉన్నతాధికారులతో మాట్లాడి పరిస్థితులను అడిగి తెలుసుకున్నారు.

ఉత్తరాఖండ్​ చమోలీ జిల్లాలోని జోషిమఠ్​ వద్ద మంచు చరియలు విరిగిపడి పెను ప్రమాదానికి దారి తీసిన ఘటనపై ప్రధానమంత్రి నరేంద్ర మోదీ సమీక్షించారు. అసోం పర్యటనలో ఉన్న ప్రధాని.. ప్రమాదం విషయం తెలిసిన వెంటనే ఉత్తరాఖండ్​ ముఖ్యమంత్రి త్రివేంద్ర సింగ్​ రావత్​, ఇతర ఉన్నతాధికారులతో మాట్లాడారు. విపత్తు గురించి వివరాలు అడిగి తెలుసుకున్నారు. సహాయ చర్యలు సాగుతున్న తీరుపై ఆరా తీశారు.

షా సమీక్ష..

ఉత్తరాఖండ్​ ప్రమాదంపై కేంద్ర హోంమంత్రి అమిత్​ షా ఉన్నతస్థాయి సమీక్ష నిర్వహించారు. ఆ రాష్ట్ర ముఖ్యమంత్రి రావత్​, ఐటీబీపీ, ఎన్​డీఆర్​ఎఫ్​ డీజీలతో మాట్లాడారు.

" ఉత్తరాఖండ్​ విపత్తుపై ఆ రాష్ట్ర ముఖ్యమంత్రి టీఎస్​ రావత్​, డీజీలు, ఐటీబీపీ, ఎన్​డీఆర్ఎఫ్​ అధికారులతో మాట్లాడాను. ప్రమాదంలో చిక్కుకున్న ప్రజలను కాపాడేందుకు సంబంధిత అధికారులు యుద్ధ ప్రాతిపదికన చర్యలు చేపట్టారు. ఎన్​డీఆర్​ఎఫ్​ బృందాలు వెళ్లాయి. అన్ని విధాల అవసరమైన సహాయక చర్యలు చేపడుతున్నాం."

- అమిత్​ షా, కేంద్ర హోంమంత్రి

రంగంలోకి వైమానిక దళ హెలికాప్టర్లు

ప్రమాద స్థాయి పెరిగిన క్రమంలో దిల్లీ నుంచి మరిన్ని ఎన్​డీఆర్​ఎఫ్​ బృందాలను విమానాల్లో ఉత్తరాఖండ్​కు తరలించినట్లు చెప్పారు అమిత్​ షా. పరిస్థితులను ఎప్పటికప్పుడు పరిశీలిస్తున్నట్లు తెలిపారు. వైమానిక దళానికి చెందిన రెండు ఎంఐ-17, ఒక ఏఎల్​హెచ్​ ధ్రువ్​ హెలికాప్టర్లను డెహ్రాడూన్​, పరిసర ప్రాంతాల్లో మెహరించారు అధికారులు. అవసరాన్ని బట్టి మరిన్ని ఎయిర్​క్రాఫ్ట్​లను మోహరిస్తామని తెలిపారు.

వరద ప్రభావిత ప్రాంతానికి సుమారు 600 మంది సైనికులను తరలిస్తున్నారు అధికారులు.

ఇదీ చూడండి:ఉత్తరాఖండ్​లో పెను ప్రమాదం- 150మంది గల్లంతు