ఆ రైల్వే గేట్​ తీయాలంటే.. లోకో పైలట్​ ట్రైన్​ దిగాల్సిందే.. ఎందుకలా?

సాధారణంగా రైల్వే లెవల్​ క్రాసింగ్​ వద్ద ఓ గేట్​మ్యాన్​ ఉండి.. రైలు వచ్చి వెళ్తున్న సమయాల్లో గేట్లు మూసివేస్తారు. మళ్లీ కాసేపటికే తెరుస్తారు. కానీ బిహార్​లోని ఓ రైల్వే క్రాసింగ్​ వద్ద అలా కాదు. గేటు సమీపానికి రైలు వచ్చినప్పుడు ట్రైన్​ నుంచి లోకో పైలట్​ దిగి.. గేటు వేయాలి, మళ్లీ కాసేపటికీ తెరవాలి. వినడానికి కొత్తగా ఉన్నా.. గత కొన్నేళ్లుగా ఇదే జరుగుతుందని స్థానికులు చెబుతున్నారు.

Unique Railway Gate: బిహార్​లోని సివాన్​లో గేట్​మ్యాన్​లేని ఓ రైల్వే లెవెల్​ క్రాసింగ్​​ ఉంది. ఆ ప్రాంతంలో ఏ రైలు వచ్చినా గేటు సమీపంలో ఆగాల్సిందే.. ఆ తర్వాత రైలు నుంచి లోకోపైలట్​ దిగి గేటు మూసివేయాలి. అనంతరం కాసేపటికే గేటు తెరవాలి. తర్వాత రైలు ముందుకు పోనివ్వాలి. సివాన్-మష్రక్​ రైలు మార్గంలో రగడ్​గంజ్​ లెవెల్​ క్రాసింగ్​ గేట్ వద్ద కొన్ని సంవత్సరాలుగా ఇదే తంతు కొనసాగుతోంది.

'ఏమైనా జరిగితే బాధ్యులెవరు?'.. అయితే కొన్నిసార్లు రైల్వే గేటు వేయకుండానే.. రైళ్లు వెళ్తున్నాయని స్థానికులు చెబుతున్నారు. అలాంటి సమయాల్లో ఏదైనా ప్రమాదం జరిగితే బాధ్యులెవరని అధికారులను ప్రశ్నిస్తున్నారు. గత కొన్నేళ్లుగా ఇదే తంతు జరుగుతున్నా ఎవరూ పట్టించుకోవడం లేదని వాపోతున్నారు.

'ఏది జరిగినా నియమాల ప్రకారమే'..అయితే ఈ విషయంపై వారణాసి రైల్వే అధికారి అశోక్​కుమార్​ స్పందించారు. దీన్ని 'ఒకే రైలు వ్యవస్థ' అంటారని, ఏది జరిగినా రైల్వే నియమాల ప్రకారమే జరుగుతుందని ఆయన చెప్పారు. నిబంధనలు ప్రకారమే లోకో పైలట్​ దిగి గేటు వేసి మళ్లీ తెరుస్తున్నాడని చెప్పడం గమనార్హం. అయితే గోరఖ్​పుర్​ రైల్వే సీనియర్​ ఇంజినీర్​ ఉపేంద్ర సింగ్​ మరో విధంగా స్పందించారు. ఆ ప్రాంతంలో లెవెల్​ క్రాసింగ్​ స్టేషన్​ లేకపోవడం వల్లే ఈ పరిస్థితి తలెత్తిందని, త్వరలోనే సమస్య పరిష్కారమవుతుందని తెలిపారు.

ఇవీ చదవండి:రెండు బైక్​లను బలంగా ఢీకొట్టిన స్కార్పియా.. బంపర్​లో బైకర్​ ఇరుక్కుని..