18:59 April 05
జవాన్లతో షా సమావేశం
ఛత్తీస్గఢ్ బీజాపుర్లోని సీఆర్పీఎఫ్ క్యాంపు వద్ద జవాన్లతో హోం మంత్రి అమిత్ షా సమావేశమయ్యారు.
జవాన్లు ఎంతో ధైర్య సాహసాలతో పోరాడన్నారు షా. మావోయిస్టు సమస్య వల్లే ఈ ప్రాంతం అభివృద్ధి చెందలేదన్నారు. లోంగిపోవాలనుకునే వారు జనజీవన స్రవంతిలోకి వస్తే స్వాగతిస్తామని పేర్కొన్నారు.
మావోయిస్టులపై పోరులో జవాన్లకు కేంద్రం అండగా ఉంటుందని భరోసా ఇచ్చారు. జవాన్ల సమస్యలను వీలైనంత త్వరగా పరిష్కరిస్తామన్నారు.
14:28 April 05
బీజాపుర్ ఎన్కౌంటర్ సమయంలో కోబ్రా దళానికి చెందిన ఓ జవానును ఎత్తుకెళ్లామన్న నక్సలైట్ల ప్రకటనలో నిజానిజాలు తేల్చేందుకు భద్రతా దళాలు ప్రయత్నిస్తున్నాయని ఉన్నతాధికారి ఒకరు వెల్లడించారు.
జవానును కిడ్నాప్ చేశామని ఆదివారం సాయంత్రం బీజాపుర్కు చెందిన ఓ జర్నలిస్టుకు నక్సలైట్లు ఫోన్ చేసి చెప్పారు. వారి ప్రకటన నిజమయ్యేందుకు అవకాశాలు ఉన్నాయని సదరు అధికారి తెలిపారు. ఎన్కౌంటర్ జరిగినప్పటి నుంచి కనిపించకుండాపోయిన 210వ కోబ్రా దళ జవాను రాకేశ్వర్ సింగ్ మిన్హాస్ ఆచూకీ ఇంకా తెలియలేదని వివరించారు.
13:02 April 05
నక్సల్స్పై జరిగే పోరాటంలో విజయం సాధిస్తామని కేంద్ర హోం మంత్రి అమిత్ షా ధీమా వ్యక్తం చేశారు. ప్రధాని నరేంద్ర మోదీ, కేంద్రం తరఫున బీజాపుర్ ఘటనలో ప్రాణాలు కోల్పోయిన అమర జవాన్లకు తాను నివాళి అర్పిస్తున్నానని తెలిపారు. జవాన్ల త్యాగాలు చిరస్మరణీయం, వారి త్యాగాలు వృథా కావన్నారు. ఛత్తీస్గఢ్లోని ఉన్నతాధికారులతో సమావేశమైన అనంతరం షా మీడియాతో మాట్లాడారు.
12:05 April 05
ఛత్తీస్గఢ్ జగదల్పుర్లోని ఉన్నతాధికారులతో కేంద్ర హోం మంత్రి అమిత్ షా సమావేశమయ్యారు. ఈ కార్యక్రమంలో ఛత్తీస్గఢ్ సీఎం భూపేశ్ బఘేల్ పాల్గొన్నారు.
11:19 April 05
బీజాపుర్ ఎన్కౌంటర్లో వీర మరణం పొందిన జవాన్లకు నివాళి అర్పించారు కేంద్ర హోం మంత్రి అమిత్ షా. అనంతరం జగదల్పుర్లోని ఉన్నతాధికారులతో సమావేశం నిర్వహించనున్నారు. గాయపడ్డ జవాన్లను పరామర్శించనున్నారు. ఆ తర్వాత సీర్పీఎఫ్ క్యాంపు కార్యాలయాన్ని సందర్శించనున్నట్లు ప్రభుత్వ వర్గాలు తెలిపాయి.
11:13 April 05
ఛత్తీస్గఢ్ ఎన్కౌంటర్లో వీర మరణం పొందిన జవాన్లకు కేంద్ర హోం మంత్రి అమిత్ షా పుష్ప గుచ్ఛాలతో నివాళులు అర్పించారు. మరికాసేపట్లో ఉన్నత అధికారులతో సమావేశం నిర్వహించనున్నారు.
10:46 April 05
మావోయిస్టుల కాల్పుల్లో వీరమరణం పొందిన జవాన్లకు కాసేపట్లో ఛత్తీస్గఢ్లోని జగ్దల్పుర్లో కేంద్ర హోం మంత్రి అమిత్ షా, ఛత్తీస్గఢ్ సీఎం భూపేశ్ బఘేల్ ఘన నివాళులు అర్పించనున్నారు.
10:20 April 05
అధికార లాంఛనాలతో..
మావోయిస్టుల ఘాతుకంతో.. వీర మరణం పొందిన జవాన్లకు భద్రతా దళాలు అంజలి ఘటించాయి. ఛత్తీస్గఢ్ బీజాపుర్లో అమర జవాన్లకు అధికార లాంఛనాలతో అంతిమ వీడ్కోలు పలికారు. జవాన్ల పార్థీవ దేహాలపై జాతీయ పతాకాన్ని కప్పి.. పుష్పగుచ్చాలు ఉంచి నివాళులు అర్పించారు.
వీర జవాన్ల కుటుంబీకుల రోదనలు అందరినీ కలచివేస్తున్నాయి.
09:10 April 05
లైవ్: బీజాపుర్ ఎన్కౌంటర్ ప్రాంతానికి అమిత్ షా
ఛత్తీస్‌గఢ్‌లో బస్తర్ అడవుల్లో ఎన్కౌంటర్ జరిగిన ప్రాంతాన్ని కేంద్ర హోంమంత్రి అమిత్ షా పరిశీలించనున్నారు. మరికాసేపట్లో అక్కడికి చేరుకోనున్నారు.
భద్రతా దళాలపై మావోయిస్టులు దాడి చేసిన ప్రాంతాన్ని ఆయన ఉన్నతాధికారులతో కలిసి పరిశీలిస్తారు. అనంతరం.. నక్సల్స్ కాల్పుల్లో గాయపడి ఆస్పత్రిలో చికిత్స పొందుతున్న జవాన్లను పరామర్శించనున్నారు. మారణకాండపై ఇప్పటికే ఉన్నతస్ధాయి సమీక్ష నిర్వహించారు హోం మంత్రి. మావోయిస్టులకు సరైన సమాధానం ఇస్తామని తెలిపారు.
బీజాపుర్- సుక్మా జిల్లా సరిహద్దుల్లో జరిగిన మావోయిస్టుల దాడిలో 22 మంది జవాన్లు ప్రాణాలు కోల్పోయారు. దాదాపు 400 మంది నక్సల్స్ జరిపిన ఈ దాడిలో మరో 30కి పైగా సైనికులు గాయాలపాలయ్యారు.