యువత, ప్రాంతాలు, సామాజిక వర్గాలను పరిగణనలోకి తీసుకుని ప్రధానమంత్రి నరేంద్ర మోదీ తన మంత్రి వర్గాన్ని.. విస్తరించారు. రాష్ట్రపతి భవన్లో జరిగిన కార్యక్రమంలో 43మంది మంత్రులుగా ప్రమాణస్వీకారం చేశారు. తాజా విస్తరణతో కేంద్ర కేబినెట్‌లో మంత్రుల సంఖ్య 77కు పెరిగింది.
15 మంది కేబినెట్ మంత్రులు, 28మంది సహాయ మంత్రులతో రాష్ట్రపతి రామ్‌నాథ్ కోవింద్‌ ప్రమాణం చేయించారు. 15 మంది కేబినెట్ మంత్రుల్లో ఇప్పటివరకూ సహాయమంత్రులుగా పనిచేసిన ఏడుగురికి పదోన్నతి లభించింది. వారిలో తెలంగాణకు చెందిన కిషన్‌ రెడ్డితో పాటు అరుణాచల్ ప్రదేశ్‌కు చెందిన కిరణ్ రిజుజు, బిహార్‌కు చెందిన ఆర్‌.కె. సింగ్, గుజరాత్‌కు చెందిన మనుసుక్‌ మాండవీయ, పురుషోత్తం రూపాలా, హిమాచల్ ప్రదేశ్‌కు చెందిన అనురాగ్ ఠాకూర్ దిల్లీకి చెందిన హర్దీప్ సింగ్ పూరీ ఉన్నారు.
మహారాష్ట్ర మాజీ ముఖ్యమంత్రి నారాయణ్‌రాణే, అసోం మాజీ సీఎం, శర్వానంద సోనోవాల్‌, మధ్యప్రదేశ్‌ నుంచి జ్యోతిరాదిత్య సింధియా సహా డాక్టర్‌ వీరేంద్ర కుమార్‌లను కేబినెట్‌లోకి తీసుకున్నారు. బిహార్‌కు చెందిన రామచంద్రప్రసాద్‌ సింగ్, పశుపతి కుమార్‌ పరాస్‌, రాజ్‌కుమార్ సింగ్‌లకు కూడా కేబినెట్‌లో చోటు దక్కింది. ఒడిశా నుంచి అశ్వినీ వైష్ణవ్‌ కేబినెట్ మంత్రిగా ప్రమాణస్వీకారం చేశారు.
యూపీకే పట్టం
మంత్రివర్గ విస్తరణలో త్వరలో శాసనసభ ఎన్నికల జరగనున్నదేశంలోనే అతిపెద్ద రాష్ట్రం ఉత్తర్‌ ప్రదేశ్‌కు పెద్దపీట వేశారు. UP నుంచి.. ఏడుగురిని మంత్రివర్గంలోకి తీసుకున్నారు. ప్రధాని మోదీ సొంత రాష్ట్రం గుజరాత్ నుంచి ఐదుగురు మంత్రులుగా ప్రమాణ స్వీకారం చేశారు. మహారాష్ట్ర, కర్ణాటక, బంగాల్ నుంచి నలుగురు చొప్పున తీసుకున్నారు. బిహార్ నుంచి ముగ్గురు,మధ్యప్రదేశ్‌, దిల్లీ, ఒడిషా నుంచి ఇద్దరు చొప్పున ప్రధాని నరేంద్ర మోదీ మంత్రివర్గంలో చోటు దక్కించుకున్నారు.ఉత్తరాఖండ్‌,రాజస్థాన్‌,అసోం,మణిపూర్‌, ఝార్ఖండ్‌, త్రిపుర, తమిళనాడు, హిమాచల్ ప్రసాద్‌, తెలంగాణ, అరుణాచల్‌ప్రదేశ్‌ నుంచి ఒక్కొక్కరు మంత్రులుగా ప్రమాణం చేశారు. తెలుగు రాష్ట్రాల నుంచి కిషన్‌ రెడ్డికి కేబినెట్ మంత్రిగా పదోన్నతిదక్కగా ఆంధ్రప్రదేశ్‌ నుంచి ఎవరికీ చోటు లభించలేదు.
ఏ వర్గం నుంచి ఎందరంటే?
కేబినెట్ విస్తరణ తర్వాత ఓబీసీ మంత్రుల సంఖ్య 27కు పెరిగింది. వారిలో ఐదుగురు కేబినెట్ మంత్రులుగా ఉన్నారు. ఎస్సీ సామాజికవర్గం నుంచి 12మంది ఉండగా..వారిలో ఇద్దరు కేబినెట్ మంత్రులు.ఎస్టీ సామాజికవర్గం నుంచి 8 మంది మంత్రులుండగా వారిలో ముగ్గురు కేబినెట్ మంత్రులుగా ఉన్నారు. ప్రస్తుత కేంద్ర మంత్రివర్గంలో 13 మంది న్యాయవాదులు, ఆరుగురు వైద్యులు, ఐదుగురు ఇంజనీర్లు, ఏడుగురు సివిల్‌ సర్వెంట్లు, ఏడుగురు పరిశోధకులు, ముగ్గురు బిజినెస్‌లో పట్టా పొందినవారు ఉన్నారు. 9 రాష్ట్రాల నుంచి 11 మంది మహిళా మంత్రులు కేబినెట్‌లో ఉన్నారు. ముస్లిం, సిక్కు, క్రిస్టియన్‌ వర్గాల నుంచి ఒక్కొక్కరు, ఇద్దరు బౌద్ధులు ఉన్నారు. మైనార్టీ వర్గానికి చెందిన ముగ్గురు కేబినెట్ మంత్రులుగా ఉన్నారు.
వారిపై వేటు
గత మంత్రివర్గంలో 53మంది మంత్రులు ఉండగా.. అమాత్యుల పనితీరు, ఇతరత్రా కారణాలతో 12 మందితో రాజీనామా చేయించారు. ఇప్పటివరకూ కేంద్ర మంత్రివర్గంలో కీలకంగా వ్యవహరించిన హర్షవర్ధన్‌, ప్రకాశ్ జావడేకర్, రవిశంకర్ ప్రసాద్‌ రాజీనామా చేశారు. సదానంద గౌడ, రమేశ్ పోఖ్రియాల్‌, సంతోష్‌ గంగవార్, బాబుల్‌ సుప్రియో, సంజయ్‌ ధోత్రే, రతన్‌లాల్‌ ఖటారియా, ప్రతాప్‌ సారంగి, దేబశ్రీ చౌదురీ సైతం రాజీనామా చేయగా... రాష్ట్రపతి ఆమోదించారు. మంత్రుల ప్రమాణ స్వీకారోత్సవానికి ఉపరాష్ట్రపతి వెంకయ్యనాయుడు, ప్రధాని నరేంద్రమోదీ, కేంద్ర మంత్రులు, ఇతర ఉన్నతాధికారులు హాజరయ్యారు.
ప్రమాణ స్వీకారం చేసిన మంత్రులు..
నారాయణ్‌ రాణే
- రాజ్యసభ ఎంపీ
- భారతీయ జనతా పార్టీ
- రాష్ట్రం: మహారాష్ట్ర
- మహారాష్ట్ర మాజీ ముఖ్యమంత్రి
సర్బానంద సోనోవాల్‌
- అసోం ఎమ్మెల్యే
- భారతీయ జనతా పార్టీ
- రాష్ట్రం: అసోం
- అసోం మాజీ సీఎం
వీరేంద్ర కుమార్‌
- లోక్సభ ఎంపీ
- భారతీయ జనతా పార్టీ
- రాష్ట్రం: మధ్యప్రదేశ్‌
- లోక్సభ నియోజకవర్గం: టికమ్‌గఢ్‌
జ్యోతిరాదిత్య సింధియా
- రాజ్యసభ ఎంపీ
- భారతీయ జనతా పార్టీ
- రాష్ట్రం: మధ్యప్రదేశ్‌
- గతంలో యూపీఏ హయాంలో మంత్రిగా పని చేసిన అనుభవం
రామ చంద్ర ప్రసాద్‌ సింగ్
- రాజ్యసభ ఎంపీ
- జనతాదళ్‌ యునైటెడ్‌
- రాష్ట్రం: బిహార్
- మాజీ ఐఏఎస్‌ అధికారి
అశ్వినీ వైష్ణవ్‌
- రాజ్యసభ ఎంపీ
- భారతీయ జనతా పార్టీ
- రాష్ట్రం: ఒడిశా
- మాజీ ఐఏఎస్‌ అధికారి
పశుపతి కుమార్‌ పారస్‌
- లోక్సభ ఎంపీ
- లోక్‌జన్‌శక్తి పార్టీ
- రాష్ట్రం: బిహార్
- లోక్సభ నియోజకవర్గం: హాజీపూర్‌
- రాంవిలాస్‌ పాసవాన్‌ సోదరుడు
భూపేంద్ర యాదవ్
- రాజ్యసభ ఎంపీ
- భారతీయ జనతా పార్టీ
- రాష్ట్రం: రాజస్థాన్‌
- భాజపా జాతీయ ప్రధాన కార్యదర్శి
పంకజ్ చౌదరి
- లోక్సభ ఎంపీ
- భారతీయ జనతా పార్టీ
- రాష్ట్రం: ఉత్తర్‌ప్రదేశ్‌
- లోక్సభ నియోజకవర్గం: మహారాజ్‌గంజ్
- ఆరుసార్లు ఎంపీగా గెలుపు
అనుప్రియ పటేల్‌
- లోక్సభ ఎంపీ
- అప్నాదళ్‌
- రాష్ట్రం: ఉత్తర్‌ప్రదేశ్‌
- లోక్సభ నియోజకవర్గం: మిర్జాపూర్
- గతంలో కేంద్రమంత్రిగా పని చేసిన అనుభవం
సత్యపాల్‌ సింగ్ బాగెల్‌
- లోక్సభ ఎంపీ
- భారతీయ జనతా పార్టీ
- రాష్ట్రం: ఉత్తర్‌ప్రదేశ్‌
- లోక్సభ నియోజకవర్గం: ఆగ్రా
రాజీవ్ చంద్రశేఖర్
- రాజ్యసభ ఎంపీ
- భారతీయ జనతా పార్టీ
- రాష్ట్రం: కర్ణాటక
- భాజపా అధికార ప్రతినిధి
శోభా కరంద్లాజే
- లోక్సభ ఎంపీ
- భారతీయ జనతా పార్టీ
- రాష్ట్రం: కర్ణాటక
- ఉడిపి-చిక్కమగళూరు లోక్సభ నియోజకవర్గం నుంచి ఎన్నిక
- కర్ణాటక మాజీ మంత్రి
భాను ప్రతాప్‌ సింగ్ వర్మ
- లోక్సభ ఎంపీ
- భారతీయ జనతా పార్టీ
- రాష్ట్రం: ఉత్తర్‌ప్రదేశ్‌
- లోక్సభ నియోజకవర్గం: జాలౌన్‌
దర్శనా జర్దోష్
- లోక్సభ ఎంపీ
- భారతీయ జనతా పార్టీ
- రాష్ట్రం: గుజరాత్
- లోక్సభ నియోజకవర్గం: సూరత్‌
మీనాక్షి లేఖి
- లోక్సభ ఎంపీ
- భారతీయ జనతా పార్టీ
- రాష్ట్రం: దిల్లీ
- లోక్సభ నియోజకవర్గం: న్యూదిల్లీ
- సుప్రీంకోర్టు న్యాయవాది
అన్నపూర్ణ దేవి యాదవ్
- లోక్సభ ఎంపీ
- భారతీయ జనతా పార్టీ
- ఝార్ఖండ్‌ మాజీ మంత్రి
- లోక్సభ నియోజకవర్గం: కోడెర్మా